- अभिजित देशमुख

Kalyan :

कल्याण पूर्वेत वालधूनी नदी पात्रात भराव टाकण्यात आल्याने पावसाळयात या ठिकाणी पुराचा धोका निर्माण झाला आहे. परिणामी नागरीकांमध्ये भीतीचे वातावरण पसरले आहे. दरम्यान नदीपात्रातील बांधकाम थांबवा अन्यथा आमरण उपोषण छेडू तसेच पुढील निवडणुकांवर बहिष्कार टाकू असा इशारा स्थानिक नागरिकांनी दिला आहे. (Maharashtra News)

कल्याण पूर्वेत विठ्ठलवाडी रेल्वे स्टेशन समोरच कल्याण डोंबिवली महापालिकने बीओटी तत्वावर एक भूखंड विकसीत करण्याचे काम एका कंत्राटदाराला दिले आहे. या कंत्राटदाराकडून वालधूनी नदी पात्रात मातीचा भराव टाकला जात आहे. या भरावामुळे नदीचे पात्र अरुंद होत आहे.

दरवर्षी पावसाळ्यात या नदीला पूर येतो. आजूबाजूच्या हजारो लोकांच्या घरात पाणी शिरते. या नदीचे पात्र अरुंद झाल्यास पावसाळ्यात नदीपात्रालगत असलेल्या जवळपास ३ हजार घरांना जलमय परिस्थितीच सामोरे जावे लागेल अशी शक्यता आहे. त्यामुळे नागरिकांमध्ये भीतीचे वातावरण असून हे काम थांबवण्याची मागणी नागरिकांनी केली आहे.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

अन्यथा पुढील आठवड्यात याच नदीपात्रात आमरण उपोषण सुरू करणार. तसेच इथून पुढील निवडणुकांवर बहिष्कार टाकण्याचा इशारा देखील या नागरिकांनी दिला.

Edited By : Siddharth Latkar