अजय दुधाणे, साम टीव्ही

अंबरनाथमध्ये गेल्या काही दिवसांत राजकीय घडामोड पाहायला मिळत आहे. काही दिवसांपूर्वी काँग्रेसच्या नगरसेवकांनी भाजपमध्ये प्रवेश केला. त्यामुळे अंबरनाथ नगरपरिषदेत भाजपचाच वरचष्मा राहणार असल्याची चर्चा होती. परंतु मागील दोन दिवसांत अजित पवारांच्या राष्ट्रवादी आणि शिंदे गटाने डाव फिरवला. त्यानंतर आज झालेल्या निवडणुकीत अजित पवारांच्या राष्ट्रवादी काँग्रेसच्या नेत्याची अंबरनाथ नगरपरिषदेच्या उपनगराध्यक्षपदी निवड झाली आहे. या खेळीची राज्यभर चर्चा होत आहे.

अंबरनाथ नगरपरिषदेच्या उपनगराध्यक्षपदी सदा मामा पाटील यांची निवड झाली. भाजप प्रणित अंबरनाथ विकास आघाडीला 28 मते मिळाली. तर अंबरनाथ शिवसेना महायुती विकास आघाडीला एकूण 32 मते मिळाली. या निवडीनंतर विरोधकांनी सदा मामा पाटील यांच्या विरोध घोषणा दिल्या.

अंबरनाथमध्ये काय राजकारण घडलं होतं?

भाजपने काँग्रेसचे नगरसेवक फोडून शिंदे गटाला धक्का दिला होता. मात्र, शिंदे गटाने अजित पवारांच्या राष्ट्रवादी काँग्रेसशी सत्ता स्थापणेसाठी हातमिळवणी केली. त्यानंतर अजित पवार गटाचे सदा मामा पाटील यांची उपनगराध्यक्षपदी निवड झाली.

काँग्रेस फुटीर नगरसेवकांसोबत सत्ता स्थापन करण्याचं स्वप्न पाहणाऱ्या भाजपला खासदार श्रीकांत शिंदे यांनी धक्का दिला. या नगरपरिषदेत सेनेचे २७ नगरसेवक निवडून आले आहेत. त्यांना आता अजित पवार गटाच्या ४ नगरसेवकांनी पाठिंबा दिला. या खेळीने शिंदे गटाने भाजपला सत्तेपासून दूर ठेवलं आहे.

अंबरनाथमध्ये भाजपचे १६ नगरसेवक निवडून आले होते. तर शिंदे गटाचे २७ नगरसेवक निवडून आले होते. सत्तेपासून दूर ठेवण्यासाठी भाजपने काँग्रेसशी आघाडी केली. टीका झाल्यानंतर भाजपने थेट काँग्रेसचे नगरसेवक फोडले. त्यानंतर आज झालेल्या उपनगराध्यक्षपदाच्या निवडणुकीत शिंदे गट आणि राष्ट्रवादी काँग्रेसने उपनगराध्यक्षाच्या निवडणुकीत बाजी मारली.