Rahul Gandhi On Adani: 'मोदी मोजक्याच लोकांना मदत करत आहेत', असं म्हणत राहुल गांधी यांनी पुन्हा एकदा अदानी समुहावरून पंतप्रधान नरेंद्र मोदी यांना लक्ष्य केलं आहे. इंडिया आघाडीची आज मुंबईत बैठक पार पडली. या बैठकीनंतर आयोजित पत्रकार परिषदेत ते असं म्हणाले आहेत.

ते म्हणाले आहेत की, मी काल पत्रकार परिषद घेत सांगितलं की, एका माणसासाठी पंतप्रधान काम करत आहेत. पंतप्रधान अदानींच्या चौकशीसाठी दबाव का टाकत नाही. पंतप्रधान आणि भाजप अदानींसोबत आहेत.

'इंडिया आघाडी भाजपला पराभूत करेल'

राहुल गांधी म्हणाले, देशातील 60 टक्के लोकांचं प्रतिनिधित्व इथे बसलेले करता आहेत. समन्वयक समिती कमिटी स्थापन केली आहे. त्यानंतर जागा वाटपाबाबत समिती नेमली आहे. ते म्हणाले की, इंडिया आघाडी भाजपला पराभूत करेल. एकत्र काम करणं महत्वाचं आहे. मी मीडियावर जास्त बोलू इच्छित नाही, पण लालू प्रसाद यादव चांगलं बोलले आहेत. (Latest Marathi News)

भाजप हटाव देश बचाव: लालूप्रसाद यादव

तत्पूर्वी बोलताना लालूप्रसाद यादव यांनीही पंतप्रधान मोदींवर टीका केली आहे. ते म्हणाले आहेत की, आम्ही एक नव्हतो, याचा फटका देशाला बसला. मोदींनी याचा लाभ घेतला. आम्ही सुरुवातीपासून सांगत आलोय, भाजप हटाव देश बचाव.

ते म्हणाले, ''आम्ही सर्व एक आहोत आणि एक राहणार. राहुल गांधी यांना विश्वास देतो की, आम्ही एकजूट होऊन लढणार. जागा वाटपाबाबत लवकर निर्णय घेणार. यात वाद घालणार नाही. मोदी सरकारला हटवून दाखवणार. शरद पवार यांना देखील शुभेच्छा. आम्ही त्यांच्या सोबत आहोत, आपल्या पक्षाला मजबूत ठेवा.''