Pimpri Chinchwad : शहरातून अवजड वाहनांना काही कालावधीसाठी प्रवेश बंदी आहे. असे असताना देखील अवजड वाहन घातळी जात असल्याने वाहतुक कोंडी होत असते. यामुळे पिंपरी चिंचवड (Pimpri Chinchwad) शहरातील वाहतूक सुरळीत करण्याकरिता शहर वाहतूक पोलिसांनी जवळपास  ६ हजार १७८ अवजड वाहनांवर कारवाई केली आहे. (Latest Marathi News)

पिंपरी चिंचवड शहरात सकाळी व सायंकाळच्या वेळी अधिक वर्दळ असते. यामुळे वाहतूक पोलिसांनी अवजड वाहनांसाठी सकाळी आठ ते अकरा आणि संध्याकाळी पाच ते नऊ वाजता दरम्यान प्रवेश बंदी केली आहे. तरी देखील वाहतूक पोलिसांचे (Traffic Police) निर्देश डावलून मोठ्या प्रमाणात अवजड वाहन पिंपरी चिंचवड शहरात सकाळी आणि संध्याकाळी प्रवेश करत आहेत. त्यामुळे पिंपरी चिंचवड शहरात वाहतूक कोंडी आणि वाहन अपघातासारख्या दुर्घटना देखील घडत आहेत. मनाई असताना अवजड वाहन शहरात प्रवेश करणाऱ्यांवर कारवाईचा बडगा पोलिसांनी उचलला आहे. 

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

पंधरा दिवसात मोठी कारवाई 

प्रामुख्याने शहरात सकाळी व सायंकाळी वाहनांची अधिक वर्दळ असल्याने वाहतूक कोंडी व अपघात रोखण्यासाठी पिंपरी चिंचवड वाहतूक पोलिसांनी अवजड वाहनांवर मोठ्या प्रमाणात कारवाई केली आहे. मागील पंधरा दिवसात अर्थात १६ ऑक्टोंबर ते १ नोव्हेंबर याकालावधीत वाहतूक पोलिसांनी ६ हजार १७८ अवजड वाहनांवर कारवाई करत ६१ लाख ७१ हजार रुपये इतका दंड आकारला आहे.