पिंपरी चिंचवडमध्ये कोयता गँगचा धुमाकूळ सुरूच असून पुन्हा एकदा शहरात मोठी घटना घडलीय. कोयता घेऊन 3 चोरट्यांनी सोसायटीमध्ये प्रवेश केला आणि दोन घरफोड्या करून दागिने लंपास केले. या घटनेमुळे स्थानिक नागरिकांमध्ये भीतीचे सावट पसरले आहे.पिंपरी चिंचवड शहरातील चिंचवड येथील मंगलशिल्प सोसायटीमध्ये रात्री साडे बाराच्या सुमारास कोयते घेऊन 3 चोर शिरले.

सोसायटीतील चौथ्या आणि सहाव्या मजल्यावरील घर फोडले आणि घरातील दागिने लंपास केले. सुदैवाने घरात कोणी नसल्यामुळे कुठलीही जीवितहानी झाली नाही. ही सर्व घटना सीसीटीव्हीमध्ये कैद झाली असून यामध्ये स्पष्ट दिसत आहे की, 3 चोरांपैकी दोघांकडे कोयते आहे. मात्र एकूण किती दागिन्यांची चोरी झाली हे याचा अधिक तपास पोलिस करत आहे. या घटनेने आजूबाजूच्या सोसायटीमध्ये खळबळ उडाली आहे.

पुणे शहर असो किंवा पिंपरी चिंचवडमध्ये वाढती गुन्हेगारी ही पोलिसांसाठी आव्हानात्मक ठरत आहे. गेल्या काही वर्षांपासून गोळीबार, भर रस्त्यात हत्या आणि गणपती विसर्जनच्याआधी झालेल्या खुनामुळे पुणे शहर अर्थातच शिक्षणाचे माहेरघर आहे की गुन्हेगारीचे? असा प्रश्न नागरिक विचारत आहे.