गोपाळ मोटघरे, पिंपरी चिंचवड प्रतिनिधी

पिंपरी-चिंचवड महानगरपालिकेतून एक मोठी बातमी समोर आली आहे. महापालिकेत लाचलुचपत प्रतिबंधक विभागाने (ACB) धडक कारवाई करत थेट मुख्य अभियंता पदावरील मोठ्या अधिकाऱ्याला रंगेहात ताब्यात घेतल्याची माहिती मिळाली आहे. प्रवीण ओंबासे असे या लाचखोर अधिकाऱ्याचे नाव असून, या कारवाईमुळे महापालिका वर्तुळात मोठी खांडोळी उडाली आहे.

मिळालेल्या सविस्तर माहितीनुसार, एका ठेकेदाराला महापालिकेत हक्काचे काम मिळवून देण्यासाठी या अधिकाऱ्याने १९ हजार रुपयांच्या लाचेची मागणी केली होती. संबंधित ठेकेदाराने याप्रकरणी एसीबीकडे अधिकृत तक्रार दाखल केली होती. तक्रारीची प्राथमिक शहानिशा केल्यानंतर लाचलुचपत प्रतिबंधक विभागाने आज थेट पिंपरी-चिंचवड महापालिकेच्या मुख्य इमारतीत सापळा रचून ही कारवाई केली.

विशेष म्हणजे, सध्या विधानपरिषद निवडणुकीची आचारसंहिता सुरू आहे आणि ती अजून संपल्याचे जाहीर झालेले नाही. अशा कडक आचारसंहितेच्या काळात आणि थेट पालिकेच्या मुख्यालयात एका वरिष्ठ अधिकाऱ्याने लाचेची मागणी केल्याने आश्चर्य व्यक्त होत आहे.

एसीबीच्या सूत्रांनी दिलेल्या माहितीनुसार, याप्रकरणी गुन्हा दाखल करण्याची प्रक्रिया वेगाने सुरू असून, कायदेशीर कारवाई पूर्ण झाल्यानंतर या संपूर्ण प्रकरणातील आणखी काही मोठे गौप्यस्फोट समोर येण्याची शक्यता वर्तवली जात आहे. पालिकेसारख्या महत्त्वाच्या ठिकाणी झालेल्या या कारवाईमुळे भ्रष्ट अधिकाऱ्यांचे धाबे दणाणले आहेत.