रुपेश पाटील, साम टीव्ही, प्रतिनिधी

Shivsena : उपमुख्यमंत्री एकनाथ शिंदे यांच्या शिंदेसेनेतील जिल्हा प्रमुखाच्या विरोधात पोलीस ठाण्यामध्ये गुन्हा दाखल करण्यात आला आहे. नोकरी लावून देतो असे आमिष दाखवत तरुणांकडून पैसे उकळल्याचा आरोप जिल्हा प्रमुखावर करण्यात आला आहे. या प्रकरणी व्हाट्सअप संभाषणाचा स्क्रीनशॉट पोलिसांना दिल्याची माहिती समोर आली आहे.

मिळालेल्या माहितीनुसार, मंत्रालयात नोकरी लावून देतो असे सांगून तरुणांकडून पैसे उकळण्याचा आरोप शिवसेना शिंदे गटाच्या युवासेना पालघर जिल्हा प्रमुखावर करण्यात आला आहे. या प्रकरणी जिल्हा प्रमुखाच्या विरोधात बोईसर पोलीस ठाण्यात गुन्हा दाखल करण्यात आला आहे. आतापर्यंत आरोपीने ५० पेक्षा जास्त तरुणांना नोकरीचे आमिष दाखवत फसवणूक केल्याचा आरोप केला जात आहे.

मंत्रालयात क्लार्कची नोकरी लावून देतो असे म्हणत युवासेना जिल्हा प्रमुख सौरभ आप्पा विरोधात बोईसर पोलीस ठाण्यात भारतीय न्याय संहिता २०२३ चे ३१६ (२), ३१८ (४) प्रमाणे फसवणूक प्रकरणात गुन्हा दाखल करण्यात आला आहे. सौरभने तरुणांकडून दोन लाख वीस हजार रुपये उकळल्याचा आरोप होत आहे.

फिर्यादीकडून आरोपी सौरभ आणि एकनाथ शिंदे यांचे खासगी सचिव काळे यांच्या व्हाट्सअप संभाषणाचा स्क्रीनशॉट देखील पोलिसांनी देण्यात आला आहे. आतापर्यंत सौरभ आप्पाने ५० पेक्षा जास्त तरुणांना नोकरी लावून देतो असे सांगून फसवणूक केल्याचा आरोप फिर्यादीने केला आहे. या प्रकरणी पालघर पोलिसांकडून पुढील तपास सुरु आहे, अशी माहिती पालघर पोलीस अधीक्षक यतिश देशमुख यांनी दिली आहे.