पाकिस्तानातून भारतामध्ये खडेमिठाची अवैध आयात केल्याचा मोठा धक्कादायक प्रकार महसूल गुप्तचर संचालनायाने (DRI) उघडकीस आणला आहे. पाकिस्तानमध्ये उत्पादित झालेल्या तब्बल 7 हजार 311 मेट्रिक टन म्हणजेच सुमारे 73 लाख किलो खडेमिठाची आयात करण्यात आल्याचे तपासात समोर आले आहे. या मालाची किंमत सुमारे 30 कोटी रुपये असल्याची माहिती आहे.

या प्रकरणात आयात करणाऱ्या कंपन्यांचे दोन मालक, एक सीमाशुल्क विभागातील दलाल आणि आयात करणारी कंपनी स्थापन करून चालवणारा दुबईस्थित एका पुरवठादार अशा ४ जणांना अटक करण्यात आली आहे. DRI ने या कारवाईला 'ऑपरेशन डीप मॅनिफेस्ट' असे नाव दिले होते. या अंतर्गत मुंबई, पुणे, दिल्लीसह गांधीधाम, आदिपूर, वेरावळ आणि पानिपत या शहरांमध्ये शोधमोहीम हाती घेण्यात आली. या कारवाईत पाकिस्तानमधून उत्पादित झालेल्या खडेमिठाची भारतात अवैधरीत्या आयात करणाऱ्या आंतरराष्ट्रीय रॅकेटचा पर्दाफाश झाला.

भारताने पाकिस्तानमधून होणाऱ्या आयातीवर घातलेली बंदी चुकवण्यासाठी आरोपींनी वेगळीच शक्कल लढवली. खडेमिठाचे मूळ पाकिस्तान असल्याची ओळख लपवण्यासाठी संयुक्त अरब अमिरातीतील (UAE) काही संस्थांच्या माध्यमातून बनावट प्रमाणपत्रे आणि पावत्या तयार करण्यात आल्याचा आरोप आहे. या कागदपत्रांमध्ये मालाच्या मूळ देशाबाबत चुकीची माहिती दाखवण्यात आली. त्यानंतर हा माल श्रीलंकेतील कोलंबो बंदरातून भारतात पाठवण्यात आला.

मालाचे पाकिस्तानी मूळ लपवण्यासाठी मालाची पाठवणी आणि संबंधित कागदपत्रांमध्ये फेरफार केला असल्याचा आरोपींवर ठेवण्यात आला आहे. या व्यवहारांना आधार देण्यासाठी दुबईस्थित कंपन्यांनी जारी केलेल्या बनावट पावत्यांचा वापर करण्यात आला आहे.

तिसऱ्या देशातून माल पाठवणे, मालाच्या मूळ उगमाबद्दल खोटी घोषणापत्र तयार करणे, बनावट व्यापारी कागदपत्रे आणि अपारदर्शक आर्थिक व्यवस्था यांसारख्या आंतरराष्ट्रीय नेटवर्कद्वारे पाकिस्तानी बनावटीच्या मालावरील भारताच्या आयात बंदीला बगल देणाऱ्या या रॅकेटचा पर्दाफाश झाला आहे.