रोहिदास घाडगे, साम टीव्ही प्रतिनिधी

NIA Cyber Attack Probe : ‘ऑपरेशन सिंदूर’दरम्यान सरकारी वेबसाइट्सवर झालेल्या कथित सायबर हल्ल्याच्या तपासाची व्याप्ती आता पुणे जिल्ह्यातील जुन्नरपर्यंत पोहोचली आहे. जुन्नरमधील तांदूळ बाजार परिसरातील दोन जणांना संशयास्पद 'मनी ट्रान्सफर' व्यवहारांच्या चौकशीसाठी केंद्रीय तपास यंत्रणेने (NIA) ताब्यात घेतल्याची माहिती समोर आली आहे. मात्र, या संदर्भात जुन्नर पोलीस ठाण्यात सध्या कोणताही गुन्हा दाखल नसल्याचे पोलिसांनी स्पष्ट केले आहे.

‘ऑपरेशन सिंदूर’च्या कालावधीत केंद्र सरकारच्या तब्बल ५४ महत्त्वाच्या वेबसाइट्सवर 'DDoS' (डिस्ट्रिब्युटेड डिनायल ऑफ सर्व्हिस) सायबर हल्ला करण्याचा प्रयत्न झाला होता. या गंभीर प्रकरणाचा तपास राष्ट्रीय तपास यंत्रणा (NIA) करत आहे. याच तपासाचा एक भाग म्हणून जुन्नरसह देशातील पाच वेगवेगळ्या ठिकाणी २४ ऑगस्ट रोजी शोधमोहीम राबवण्यात आली.

तपासादरम्यान जुन्नरच्या तांदूळ बाजार परिसरातील दोन स्थानिक रहिवाशांना मनी ट्रान्सफर व्यवहारांशी संबंधित चौकशीसाठी तपास यंत्रणेने सोबत नेले आहे. मात्र, जुन्नर स्थानिक पोलीस ठाण्यात त्यांच्याविरोधात कोणत्याही गुन्ह्याची नोंद नाही.

NIA च्या या संयुक्त कारवाईदरम्यान एकूण तीन लॅपटॉप, पाच मोबाईल आणि इतर डिजिटल साहित्य जप्त करण्यात आले आहे. परंतु, यापैकी नेमके कोणते साहित्य जुन्नरमधून जप्त केले गेले, याबद्दल अधिकृत माहिती देण्यात आलेली नाही. त्यामुळे या दोघांचा या सायबर हल्ल्याशी नेमका काय संबंध आहे आणि त्या मनी ट्रान्सफर व्यवहारांचे धागेधोरे कुठे जोडले गेले आहेत, हे NIA च्या पुढील तपासातूनच समोर येईल.