देहू : देहू नगरीत सध्या चिकुनगुणीया आणि डेंगूचे रुग्ण मोठ्या संख्येने वाढू लागले आहेत. सध्या देहू नगरपंचायतीच्या हद्दीत नऊ चिकुनगुनियाचे (chikungunya) तर तीन डेंगूचे (dengue) रुग्ण आढळले आहेत. दरम्यान अवघ्या काही दिवसांवर जगद्गुरू संत तुकाराम महाराजांचा पालखी प्रस्थान सोहळा येऊन ठेपला आहे. या पालखी सोहळ्याच्या आधी पंतप्रधान नरेंद्र मोदी (narendra modi) हे देहूच्या (dehu) शिळा मंदिराचे लोकार्पण साेहळ्यासाठी येत आहेत. या पार्श्वभुमीवर आराेग्य (health) विभाग सतर्क झाले आहे. (dehu latest marathi news)

देहू नगरपंचायतीच्या हद्दीतील विठ्ठलवाडी भागांतील पाण्याच्या टाकी जवळच्या भागात चौदा मे पासून चिकुनगुनीया सदृश लक्षणे असलेले रुग्ण आढळून आले होते. त्यांच्या रक्ताचे नमुने राष्ट्रीय विषाणू प्रयोगशाळेत तपासणीसाठी पाठवले होते. याचा तपासणी अहवाल मिळाल्यानंतर यात नऊ चिकुनगुनियाचे रुग्ण असल्याचे स्पष्ट झाले. चिकुनगुनियाची वाढती रुग्णसंख्या पाहता प्रशासनाने तातडीने ठाेस पावले उचलली आहेत. यामध्ये संबंधित बाधित परिसरात कोरडा दिवस पाळणे व धूर फवारणी करण्यात येत आहे.

प्रशासनाकडून देहू नगरी निरोगी ठेवण्यासाठी पावले उचलली गेली आहेत. नागरिकांनी देखील घर आणि परिसरात स्वच्छता ठेवावी. नियमितपणे एक दिवस कोरडा पाळावा असे आवाहन डॉ. किशोर यादव (प्राथमिक आरोग्य केंद्र, देहू) यांनी केले आहे.

Edited By : Siddharth Latkar