प्राची कुलकर्णी

Sharad Pawar News : 'सुप्रिया सुळे राजकारणात येईल असं वाटलं नव्हतं. पण एकच मुलगी असली की काही हट्ट सहन करावे लागतात. मुलीबद्दल अंदाज कसं चुकू शकतं याचं हे एक उत्तम उदाहरण आहे असं म्हणावं लागेल, असे राष्ट्रवादी काँग्रेसचे अध्यक्ष शरद पवार (Sharad Pawar) यांनी एका जुन्या मुलाखतीमधील अंदाजावर भाष्य केले.

पुणे डॉक्टर्स असोसिएशनचा वतीने एक मुलगी असणाऱ्या कुटुंबांचा सन्मान करण्यात येत आहे. गणेश कला क्रीडा रंगमंच येथे होणाऱ्या या कार्यक्रमात राष्ट्रवादीचे अध्यक्ष शरद पवार आणि खासदार सुप्रिया सुळे यांची मुलाखत घेण्यात येत आहे. या कार्यक्रमातील मुलाखतीत शरद पवार आणि सुप्रिया सुळे यांनी विविध प्रश्नांवर उत्तरे दिली.

या मुलाखतीमधील कार्यक्रमात शरद पवारांची एक जुनी मुलाखत लागली, यात शरद पवार म्हणाले, माझी मुलगी लगेच राजकारणात पडेल असं नाही. तिला तशी इच्छा पण नाही'. या चुकलेल्या अंदाजावर शरद पवार आणि सुप्रिया सुळे हे दोघेही खळकळून हसले. या चुकलेल्या अंदाजावर भाष्य करताना शरद पवार म्हणाले, 'एकच मुलगी असली की काही हट्ट सहन करावे लागतात. मुलीबद्दल अंदाज कसं चुकू शकतं याचं हे एक उत्तम उदाहरण आहे असं म्हणावं लागेल'.

शरद पवार हे स्त्री दृष्टीकोनावर पुढे म्हणाले, 'माझ्यावर झालेल्या संस्काराचे श्रेय माझ्या आईचे आहे. घरात कोणी शिक्षित नव्हते. आईने आम्हाला शिकवलं. त्यामुळे माझा स्त्रियांविषयी विचार करण्याची मानसिकता तेव्हा पासूनच बदलली. निवडणुकीला उभा राहिलो आणि एका गावात गेलो. तिथे लोक म्हणाले तुम्हाला मत देतो पण एकच मुलगी ? अग्नी कोण देणार ? म्हणजे लोकांना अग्नीची चिंता'.