संजय गडदे, साम टीव्ही

बनावट देशी दारूची वाहतूक करणाऱ्या दहा चाकी ट्रकवर राज्य उत्पादन शुल्क विभागाच्या जी विभागाने कारवाई केली. या कारवाईत बनावट देशी दारूचे ६०० बॉक्स आणि ट्रक असा एकूण ४४ लाख १० हजार रुपयांचा मुद्देमाल जप्त करण्यात आला असून, एका आरोपीला अटक करण्यात आली आहे. राज्य उत्पादन शुल्क विभागाला गुप्त बातमीदारामार्फत बनावट देशी दारूची वाहतूक होणार असल्याची माहिती मिळाली होती. त्यानुसार ३ ऑक्टोबर २०२६ रोजी रात्री साडेअकराच्या सुमारास नवी मुंबईतील जुनेनगर रेल्वे स्टेशनसमोर, पनवेल-सायन महामार्गावर संशयित ट्रक अडवण्यात आला.

राज्य उत्पादन शुल्क विभागाला गुप्त बातमीदारामार्फत बनावट देशी दारूची वाहतूक होणार असल्याची माहिती मिळाली होती. त्यानुसार ३ ऑक्टोबर २०२६ रोजी रात्री साडेअकराच्या सुमारास नवी मुंबईतील जुनेनगर रेल्वे स्टेशनसमोर, पनवेल-सायन महामार्गावर संशयित ट्रक अडवण्यात आला. अशोक लेलँड कंपनीच्या लाल रंगाच्या दहा चाकी ट्रकमधून बनावट देशी दारूची वाहतूक होत असल्याचा संशय आल्याने अधिकाऱ्यांनी वाहनाची तपासणी केली. या वेळी ट्रकमध्ये दारूचे बॉक्स आढळून आले. तपासणीदरम्यान टँगो पंचच्या १०० मिली क्षमतेच्या आणि ठोकी संत्राच्या ९० मिली क्षमतेच्या बनावट देशी दारूच्या बाटल्यांचे एकूण ६०० बॉक्स मिळून आले.

विभागाने बनावट दारूचा साठा आणि दारू वाहतुकीसाठी वापरण्यात येणारा MH-40-N-6629 क्रमांकाचा ट्रक जप्त केला. जप्त केलेल्या मुद्देमालाची एकूण किंमत ४४ लाख १० हजार रुपये असल्याचे प्रसिद्धीपत्रकात नमूद करण्यात आले आहे. या प्रकरणी दारूबंदी गुन्हा नोंदवून एका आरोपीला अटक करण्यात आली आहे.

ही कारवाई राज्य उत्पादन शुल्क विभागाचे आयुक्त डॉ. राजेश देशमुख, सहआयुक्त प्रसाद सुर्वे आणि कोकण विभागाचे विभागीय उपआयुक्त प्रदीप पवार यांच्या मार्गदर्शनाखाली करण्यात आली. अधीक्षक प्रवीण तांबे, उपअधीक्षक रत्नमाला गायकवाड आणि प्र. उपअधीक्षक आनंद पवार यांच्या मार्गदर्शनाखाली निरीक्षक दीपक शेवाळे, दुय्यम निरीक्षक पुंडलिक धुळे तसेच विभागातील अन्य अधिकारी व कर्मचाऱ्यांनी या कारवाईत सहभाग घेतला. या प्रकरणाचा पुढील तपास राज्य उत्पादन शुल्क विभागाकडून सुरू आहे.