नवी मुंबईत धक्कादायक घटना घडली आहे. प्रेमात अडसर ठरणाऱ्या पतीला पत्नीने बॉयफ्रेंडच्या मदतीने संपवलं. सदर घटना नवी मुंबईच्या ऐरोली परिसरात घडली असून या घटनेने खळबळ उडाली आहे. तब्बल ११ महिन्यांपूर्वी घडलेल्या गुन्ह्याचा छडा पोलिसांनी लावला असून आरोपींना ताब्यात घेण्यात आले आहे. याप्रकरणी पोलीस पुढील तपास करत आहेत.

नेमकं काय प्रकरण?

मिळालेल्या माहितीनुसार, बलीराम सूर्यनाथ कुशवाहा (वय ५०) हे ऐरोलीतील यादव नगर येथे पत्नी सुनीता कुशवाहा आणि दोन मुलांसह राहत होते. सुनीता कुशवाहा (वय ४०) हिचे घणसोली येथील ऑटोचालक राहुल दशरथ प्रजापती (वय ३०) याच्याशी प्रेमसंबंध होते. या संबंधांबाबत बलीराम यांनी आक्षेप घेतल्याने पती-पत्नीमध्ये वारंवार वाद होत होते. याच वादातून बलीराम यांचा कायमचा काटा काढण्याचा कट रचला.

'त्या' रात्री नेमकं काय घडलं?

पोलिसांच्या प्राथमिक तपासानुसार, ९ ऑगस्ट २०२५ रोजी सुनीताने दोन्ही मुलांना तिच्या बहिणीकडे पाठवले. त्याच रात्री बलीराम घरात झोपलेले असताना सुनीता आणि राहुल यांनी त्यांच्यावर हल्ला केला. गळा दाबून त्यांची हत्या करण्यात आली. त्यानंतर मृतदेहाची ओळख पटू नये आणि पुरावे नष्ट व्हावेत यासाठी आरोपींनी मृतदेहाचे तुकडे केले.

कसा फसला गुन्हेगारांचा डाव?

तपासात असेही समोर आले आहे की, मृतदेहाचे वेगवेगळे भाग पोत्यांमध्ये आणि चादरींमध्ये गुंडाळून राहुलच्या ऑटो-रिक्षामधून गवळी देव टेकडी परिसरात नेण्यात आले. तेथे विविध ठिकाणी हे टाकण्यात आले. घटनेनंतर बलीराम बेपत्ता असल्याचे भासवत आरोपींनी पोलिसांची दिशाभूल करण्याचा प्रयत्न केला. मात्र तपासादरम्यान काही संशयास्पद बाबी समोर आल्यानंतर पोलिसांनी सुनीता आणि राहुल यांची कसून चौकशी केली. चौकशीदरम्यान दोघांनी गुन्ह्याची कबुली दिली. आरोपींच्या जबाबानंतर सध्या रबाळे एमआयडीसी पोलीस या प्रकरणाचा सखोल तपास करत आहे.