पुणे जिल्ह्यातील भोर तालुक्यातील नसरापूरमध्ये १ मे रोजी साडेतीन वर्षांच्या चिमुकलीवर अत्याचार करून तिची हत्या करण्यात आली होती. या घटनेनंतर संपूर्ण राज्यात तीव्र संताप व्यक्त करण्यात आला होता. हा गुन्हा घडल्यानंतर अवघ्या सव्वा ते दीड महिन्याच्या आतच या प्रकरणाचा निकाल आज जाहीर झाला आहे.

राज्याच्या न्यायालयीन इतिहासात इतक्या वेगाने निकाल लागलेला हा पहिलाच खटला असल्याचं मानलं जातंय. या प्रकरणात भीमराव प्रभाकर कांबळे याला पोलिसांनी अटक केली होती. पुणे जिल्हा सत्र न्यायालयात विशेष न्यायाधीश एस. आर. साळुंखे यांनी या खटल्याचा निकाल देत आरोपीला दोषी ठरवलं. यावेळी कोर्टात शिक्षेबाबत युक्तीवाद सुरु आहे.

आज कोर्टात काय घडलं?

नसरापूर हत्या प्रकरणातील आरोपी भीमराव कांबळेला न्यायालयाने या प्रकरणात दोषी ठरवलंय. सुनावणीदरम्यान न्यायाधीशांनी त्याला आरोपीच्या पिंजऱ्यात उभं करून विचारले की, त्या घटनेचा प्रसंग आठवून तूच सांग की तुला कोणती शिक्षा द्यायला हवी. यावर आरोपी भीमराव कांबळेने पुन्हा एक वेगळी कहाणी सांगत न्यायालयाला म्हटलं की, “मी त्या दिवशी त्या मुलीला गाठी-शेव खाण्यासाठी घेऊन गेलो होतो. त्या वेळी माझा पाय घसरला आणि मी पडलो, त्याच वेळी त्या मुलीच्या डोक्यालाही मार लागला. मी तिला शांत करण्याचा प्रयत्न केला, पण ती सतत ओरडत होती,” असं त्याने सांगितलं.

त्यानंतर न्यायाधीशांनी दोषी ठरलेल्या भीमराव कांबळेला सांगितलं की, “आता तू जे काही सांगतोयस तो इतिहास आहे, कारण तुझ्यावर गुन्हा सिद्ध झाला आहे. तुला कोणती शिक्षा द्यायला हवी?” या प्रश्नावर भीमराव कांबळेने काहीही उत्तर दिलं नाही. गुन्हेगार ठरलेल्या भिमराव कांबळेला कोणती शिक्षा देण्यात यावी यासाठी दोन्ही पक्षांकडून न्यायाधीशांसमोर युक्तीवाद सुरु आहे.