दिशा सालियन मृत्यू प्रकरण पुन्हा चर्चेत आलं आहे. दिशा सालियन प्रकरणात तिच्या वडिलांनी कोर्टात याचिका दाखल केल्यानंतर राजकीय वर्तुळात खळबळ उडाली आहे. सालियनच्या वडिलांनी दाखल केलेल्या याचिकेत आदित्य ठाकरे यांच्या नावाचाही समावेश आहे. याच प्रकरणावरून खासदार नारायण राणे यांनी आता खळबळजनक दावा केला आहे. दिशा सालियन प्रकरणाचा कर्ताधर्ता सचिन वाझे असल्याचा दावा नारायण राणे यांनी केला आहे.

खासदार नारायण राणे यांनी पत्रकार परिषद घेत राज्यातील घडामोडींवर भाष्य केलं. यावेळी राणेंनी दिशा सालियन प्रकरणावरून उद्धव ठाकरेंबाबत मोठा दावा केला. दिशा सालियन प्रकरणाची घटना घडली. त्यावेळी मला उद्धव ठाकरे यांचे दोन फोन आले होते. मी मुंबईतील जुहू येथील घरी चाललो होते. मी वांद्रे ओलांडल्यानंतर एक कॉल आला. मिलिंद नार्वेकर यांचा फोन होता. त्यांनी मला साहेबांना बोलायचं असल्याचं सांगितलं. त्यानंतर मी कोण साहेब विचारलं. त्यानंतर त्यांनी उद्धव ठाकरे असल्याचे सांगितलं.

'मी सुरुवातीला जय महाराष्ट्र साहेब म्हटलं. त्यानंतर त्यांनी तुम्ही अजून जय महाराष्ट्र म्हणता, असं म्हटलं. त्यानंतर मी पटकण उत्तर दिलं. त्यानंतर उद्धव ठाकरे म्हणाले, तुम्हाला मुले आहेत. मलाही मुले आहेत. तुम्ही प्रेसमध्ये आदित्यचं नाव घेता. माझी विनंती आहे की, आपण त्याचा नावाचा उल्लेख करू नये'. त्यानंतर मी त्यांना म्हटलं की, 'मी अमुक ठिकाणी कोण आहे, याचा उल्लेख केलेला नाही. मी निपराध मुलीची अत्याचार करून हत्या झाली. मी आरोपींना अटक करण्याविषयी बोलत आहे. तुमचा मुलगा संध्याकाळी कुठे जातो, त्यापासून सांभाळा. त्याला सांगा की, डिनो मोरियाच्या घरी जाऊन तीन-चार काय धुमाकूळ घालतो, हे मला माहीत नाही. मला माहीत आहे, पण तुम्हाला सांगणार नाही. त्यानंतर त्यांनी मी पाहतो, असं सांगितलं, असं नारायण राणेंनी सांगितलं.