नालासोपाऱ्यात शिक्षकी पेशाला काळिमा ठरणारी घटना घडली आहे. नालासोपारा पश्चिम येथील एका अकॅडमीमध्ये शिकणाऱ्या एका अल्पवयीन मुलीवर शिक्षकाने छेडछाड केल्याचा धक्कादायक प्रकार समोर आला आहे. राहुल दुबे असे आरोपी शिक्षकाचे नाव असून, पालक आणि स्थानिक नागरिकांनी यावर तीव्र संताप व्यक्त केला आहे.

मिळालेल्या माहितीनुसार, नालासोपारा पश्चिम येथील हनुमान मंदिराजवळ सुप्रसिद्ध IITN अकॅडमी आहे. पीडित मुलगी काही दिवसांपासून या अकॅडमीमध्ये शिकत होती. दरम्यान, आरोपी शिक्षक राहुल दुबे तिच्याशी सतत गैरवर्तन करत असल्याचे समजते. त्याचे वर्तन अधिकाधिक त्रासदायक आणि संशयास्पद होत असल्याने मुलगी धास्तावली होती. शेवटी तिने धैर्य करून आपल्यावर घडणारा छळ आपल्या पालकांना सांगितला. मुलीच्या तोंडून ही बाब कळताच पालकांनी संताप व्यक्त करत थेट अकॅडमी गाठली. तेथे त्यांनी आरोपी शिक्षकाला जाब विचारला असता, पालक आणि स्थानिक नागरिकांनी संतापाच्या भरात त्याला चांगलाच चोप दिला.

यानंतर तातडीने नालासोपारा पोलिसांना माहिती देण्यात आली. पोलीस घटनास्थळी पोहोचले आणि आरोपी शिक्षकाला ताब्यात घेतले. सध्या त्याच्यावर अल्पवयीन मुलीशी गैरवर्तन व छेडछाडीच्या गंभीर आरोपांखाली गुन्हा दाखल करण्यात आला असून, पुढील तपास नालासोपारा पोलीस करत आहेत.

या घटनेनंतर परिसरातील नागरिकांमध्ये प्रचंड संतापाची लाट उसळली आहे. शिक्षणसंस्था ही सुरक्षिततेचे ठिकाण असावे, पण शिक्षकच जर विद्यार्थिनींवर छेडछाड करत असतील, तर पालकांनी आपल्या मुलींच्या सुरक्षिततेचा प्रश्न उपस्थित करणे साहजिकच आहे. स्थानिकांनी या प्रकाराला “शिक्षणविश्वाला कलंक” असल्याचे म्हणत अकॅडमीविरोधातही रोष व्यक्त केला आहे. या प्रकरणामुळे नालासोपाऱ्यासह संपूर्ण पालघर जिल्ह्यात खळबळ उडाली आहे.