मुंबई : मुंबईत पहाटेपासून मुसळधार पाऊस सुरु आहे. या मुसळधार पावसामुळे शहरातील विविध भागात पाणी साचलं आहे. या पावसाचा तिन्ही रेल्वे सेवांना फटका बसला आहे. यामुळे लोकल सेवा उशिराने धावत आहे. रस्ते वाहतुकीलाही फटका बसला आहे. एकीकडे पावसामुळे नागरिकाचे प्रचंड हाल झालेले असताना दुसरीकडे एक आनंदाची पहिली बातमी समोर आली आहे.

मुंबई शहराला पाणीपुरवठा करणारा पहिला तलाव ओव्हर फ्लो झाला आहे. याआधी मुंबईतील औद्योगिक कारणासाठी वापरात येणारा पवई तलाव भरला. त्यानंतर आता पाणीपुरवठा करणारा तुळशी तलाव भरला आहे. तुळशी तलाव भरल्याने मुंबईकरांना मोठा पाणीदिलासा मिळाला आहे.

मुंबईत कृत्रिम तलावापैकी एक असलेला पवई तलाव ८ जुलै रोजी भरला. पवई तलाव हा ८ जुलै रोजी पहाटे ४.४५ वाजता भरून वाहू लागला. ५४५ कोटी लीटर क्षमता असणारा तलाव भरल्याने मुंबईतील उद्योजकांना दिलासा मिळाला. त्यानंतर शहराला पाणीपुरवठा करणारा तलाव भरल्याचे समोर आले आहे. मुंबईला एकूण सात धरणांमधून पाणी पुरवठा केला जातो. अप्पर वैतरणा, मोडक सागर , तानसा, मध्य वैतरणा, भातसा, विहार, तुळशी अशा एकूण सात धरणांमधून पाणी पुरवठा केला जातो.

मुंबईला पाणीपुरवठा करणाऱ्या या सातही धरणातील पाणीसाठा कमी झाल्याने मुंबईत १० टक्के पाणीकपात लागू केली होती. मात्र, मुंबईला पाणीपुरवठा करणारा पहिला तलाव भरल्याने पाणीकपातीतून लवकरच सुटका होण्याची शक्यता व्यक्त केली जात आहे. मुंबईतील संजय गांधी राष्ट्रीय उद्यानमधील तुळशी तलाव ओव्हर फ्लो झाला आहे. सकाळपासून सुरु असलेल्या मुसळधार पाऊस फायदेशीर ठरल्याचे बोलले जात आहे.

मुंबईला पाणी पुरवठा करणाऱ्या धरणांमधील पाणीसाठा -

- अप्पर वैतरणा - ९.४ टक्के पाणीसाठा

- मोडक सागर - ५८.२९ टक्के पाणीसाठा

- तानसा - ७६.५८ टक्के पाणीसाठा

- मध्य वैतरणा - ३७. ३१ टक्के पाणीसाठा

- भातसा - ४०.११ टक्के पाणीसाठा

- विहार - ६२.९२ टक्के पाणीसाठा

- तुळशी - १०० टक्के पाणीसाठा