संजय गदडे, साम टीव्ही

मुंबईत कामाच्या ठिकाणी महिलांच्या सुरक्षेचा प्रश्न पुन्हा एकदा ऐरणीवर आला आहे. महामुंबई मेट्रोच्या चारकोप डेपोमध्ये एका सुरक्षा व्यवस्थापकाने कनिष्ठ महिला अभियंत्यावर लैंगिक छळ केल्याचा गंभीर आरोप समोर आला आहे. मेट्रोमध्ये कायमस्वरूपी नोकरी मिळवून देण्याचे आमिष दाखवत कार्यालयातच विनयभंग केल्याचा आरोप संबंधित महिलेने केला आहे. या प्रकरणी चारकोप पोलिस ठाण्यात गुन्हा दाखल करण्यात आला आहे.

पोलिसांच्या माहितीनुसार, विरार येथे राहणारी ४६ वर्षीय महिला अभियंता महामुंबई मेट्रो संचालन मर्यादित कंपनीत कंत्राटी पद्धतीवर कार्यरत आहे. कायमस्वरूपी नोकरीसाठी प्रयत्न सुरू असताना, डेपोतील सुरक्षा व्यवस्थापकाने त्याचा गैरफायदा घेतल्याचा आरोप आहे. मार्च २०२५ मध्ये मस्टर मंजुरीच्या कामानिमित्त ती अधिकाऱ्याला भेटण्यासाठी गेली. त्यावेळी “तुमचे सरकारी काम मीच करून देऊ शकतो,” असे सांगून त्याने तिच्याशी अश्लील वर्तन केल्याचे तक्रारीत नमूद करण्यात आले आहे.

महिलेने प्रसंगावधान राखत त्या ठिकाणाहून स्वतःची सुटका केली. त्यानंतर याबाबत महिला आयोग तसेच कंपनीच्या अंतर्गत समितीकडे तक्रार दाखल केली. तक्रारीनंतर तिला नोकरीवरून कमी करण्यात आल्याचा आरोपही तिने केला आहे. मात्र महिला आयोगाच्या हस्तक्षेपानंतर तिला पुन्हा कामावर घेण्यात आले.

दरम्यान, सातत्याने पाठपुरावा केल्यानंतर चारकोप पोलिसांनी संबंधित सुरक्षा व्यवस्थापकाविरोधात विनयभंगाचा गुन्हा नोंदवला आहे. आरोपी अधिकाऱ्यावर कठोर कारवाई करावी, अशी मागणी महिलेने मुख्यमंत्री आणि उपमुख्यमंत्री यांच्याकडे केली आहे. सरकारी अधिकारी असल्याने त्याला संरक्षण दिले जात असल्याचा आरोपही तिने केला आहे.