मुलुंड रेल्वे स्थानकावर मध्यरात्री एक धक्कादायक घटना घडली. रेल्वे स्थानकावर एका महिला डॉक्टरचा लैंगिक छळ केल्याप्रकरणी कु्र्ला (जीआरपी) पोलिसांनी एका ३४ वर्षीय आरोपीला अटक केली आहे. न्यायालयाने आरोपीला २ दिवसांची पोलीस कोठडी सुनावली आहे. आरोपी हा शेअर बाजार व्यापारी म्हणून काम करत असून, नवी मुंबईतील रबाळे परिसरातील रहिवासी असल्याची माहिती आहे.

पोलिसांनी दिलेल्या माहितीनुसार, महेश पाखरे असे आरोपीचे नाव आहे. तर, पीडित महिला होमिओपॅथी डॉक्टर (वय वर्ष २४) ही दादर पश्चिम येथील रहिवासी आहे. ही घटना १५ नोव्हेंबर रोजी मध्यरात्री १ ते १:१० च्या दरम्यान घडली आहे. पीडित महिला मुलुंड रेल्वे स्थानकाच्या प्लॅटफॉर्म क्रमांक २ वर ट्रेनची वाट पाहत होती.

आरोपी महेश पाखरे महिलेचा पाठलाग करत होता. तो एकटक महिलेकडे पाहत होता. अश्लील हावभाव करून जवळ जाण्याचा प्रयत्न करत होता. महिलेनं यानंतर लोकलमधील आलार्म वाजवला. त्यानंतर जीआरपी पोलिसांनी घटनास्थळी धाव घेतली. तसेच आरोपी महेश पाखरेला पोलिसांनी बेड्या ठोकल्या. पीडित महिलेनं त्यानंतर कुर्ला जीआरपीकडे तक्रार दाखल केली.

पोलिसांनी पीडित महिलेच्या तक्रारीवरून कुर्ला जीआरपीने त्याच्याविरूद्ध कलम ७४ अंतर्गत गुन्हा दाखल केला आहे. मिळालेल्या माहितीनुसार, महेश पाखरे हा शेअर मार्केट ट्रेडर असून, तो नवी मुंबईतील रबाळे परिसरात राहत असल्याची माहिती आहे.