आपलं स्वत:चं मोठं घर असावं हे सगळ्यांच मोठं स्वप्न असतं. आणि हे स्वप्न सत्यात उतरवण्यासाठी अनेक जण जीवाचं रान करतात. तुमची इमारत जुनी झाली असेल आणि रिडेव्हलपमेंटसाठी तुम्ही बिल्डर शोधत असाल तर जरा थांबा... कारण आता तुम्ही स्वत: तुमच्या इमारतीचा विकास करु शकता. मुंबईत सेल्फ रिडेव्हलपमेंटचा प्रयोग य़शस्वी झाला आहे. आणि दहापट मोठं घरही मिळालं आहे.

विलेपार्ले पूर्वेकडील नंददीप को ऑपरेटिव्ह हाऊसिंग सोसायटीचा पुनर्विकास खासगी विकासकाची मदत न घेता 16 सभासदांनी स्वत:च करून नवा पायंडा घातला. 10 मजली नव्या इमारतीत एकूण 21 सदनिका बांधल्यानंतर दलालांविना त्यांची यशस्वीरित्या सभासदांमध्ये विक्रीही केली. हा स्वयंपूर्णविकास कोणत्याही विकासकाकडे न जाता किंवा खाजगी बँकेकडे न जाता मुंबई जिल्हा बँकेच्या सहकार्याने आणि इमारतीतील तीन घरं विक्री करून करण्यात आला आहे.

मुंबई जिल्हा बँकेचे अध्यक्ष प्रवीण दरेकर यांच्या हस्ते सोसायटीच्या सभासदांना चाव्या सूपूर्द करण्यात आल्या. अवघ्या अडीच वर्षात सोसायटीतील सभासदांना आपल्या हक्काचे पहिल्या पेक्षा मोठं घर मिळालंय. सभासदांच्या चेहऱ्यावर एक वेगळाच आनंद पाहायला मिळाला. विशेष म्हणजे पूर्वी 400 चौरस फुटाच्या घरात राहणारे आता 1400 चौरस फुटांच्या घरात राहण्यास जात आहेत.

1) घनश्याम सोमपुरा, अध्यक्ष, नंददीप सोसायटी

2) सुवर्णा खानविलकर, घर खरेदीदार

अनेक ठिकाणी बिल्डरांची मनमानी पहायला मिळते. ग्राहकांची लूट होते. ग्राहकांना दिलेली आश्वासने कागदावरच राहतात. मात्र विले पार्लेमधील नंददीप सोसायटीने बिल्डरला टाळून विकसीत केलेली ही इमारत आता शहरातील इतर सोसायट्यांनाही खुणावत आहे.