सूरज सावंत, मुंबई

Mumbai News: अनैतिक संबंधातून (Extra Marital Affair) पत्नीची हत्या करणाऱ्या आरोपीने 5 वर्षांनंतर तिच्या प्रियकरालाही संपवले आहे. मुंबईच्या डोंगरी परिसरात ही घटना घडली आहे. याप्रकरणी जे.जे. मार्ग पोलिसांनी (J J Marg Police) आरोपीला अटक केली आहे. आरोपी हा मुळचा बिहारचा (Bihar) आहे. पत्नीच्या हत्येप्रकरणी त्याला तुरुंगवासाची शिक्षा झाली होती. तुरुंगातून सुटका आल्यानंतर त्याने पत्नीच्या प्रियकराची देखील हत्या केली.

मिळालेल्या माहितीनुसार, मुंबईच्या डोंगरी परिसरात एका व्यक्तीची हत्या करण्यात आल्याची घटना समोर आली आहे. धर्मा नाडर (42 वर्षे) या व्यक्तीची हत्या करण्यात आली आहे. याप्रकरणी जे. जे मार्ग पोलिसांनी आरोपी ब्रिजेश प्रसाद (39 वर्षे) याच्याविरोधात गुन्हा दाखल करत त्याला अटक केली. याप्रकरणाचा तपास करत असताना धक्कादायक माहिती समोर आली आहे.

आरोपीला 5 वर्षांपूर्वी म्हणजे 2018 मध्ये पत्नीचे आणि धर्माचे अनैतिक संबंध असल्याचे समजले होते. त्यानंतर संतप्त होत त्याने पत्नीची हत्या केली होती. त्याप्रकरणी लोकमान्य टिळक मार्ग पोलिस ठाण्यात गुन्हा दाखल झाल्यानंतर आरोपीला अटक झाली होती. त्यावेळी आरोपी ब्रिजेशने त्याच्या पत्नीचा प्रियकर असलेल्या धर्मा नाडरची देखील हत्या करण्याची धमकी दिली होती. पत्नीच्या हत्या प्रकरणी ब्रिजेशला तुरुंगवासाची शिक्षा झाली होती.

तुरुंगातून सुटका झाल्यानंतर आरोपी ब्रिजेशने बुधवारी डोंगरी इमामवाडा येथे धर्माची चाकूने भोसकून हत्या केली. या प्रकरणी पोलिसांनी आरोपी ब्रिजेश प्रसादला अटक केली. धर्मा नाडर हा ब्रिजेश प्रसादच्या हाताखाली सफाई कामगार म्हणून काम करत होता. धर्माचे आपल्या पत्नीसोबत अनैतिक संबंध असल्याचे कळाल्यानंतर ब्रिजेशने संतप्त होत आधी पत्नीची हत्या केली. त्यानंतर तुरुंगातून बाहेर आल्यानंतर त्याने धर्माची हत्या केली. या घटनेचा तपास जे. जे मार्ग पोलिसांकडून सुरु आहे.