मुंबई: मुंबईच्या मलबार हिल पोलिसांनी सायबर खंडणी (एक्सटॉर्शन) प्रकरणी तिघांना गुजरातहून अटक केली आहे. विशेष म्हणजे या आरोपींच्या आर्थिक व्यवहारांच्या तपासणीत आरोपींनी सायबर खंडणीचा सर्व पैसा आभासी चलनात (क्रीप्टोकरन्सी) करन्सीमध्ये गुंतवल्याचे निष्पन्न झाले आहे. (Mumbai police arrest cyber ransom seekers from Gujarat)

हे देखील पहा -

परदेशातून आरोपींच्या संपर्कात असलेल्या नायजेरीयन आरोपींना आभासी चलनामार्फत ती हस्तांतरीत करण्यात आल्याचेही पोलिसांच्या तपासात निष्पन्न झाले आहे. मलबार हिलमधील ३२ वर्षीय व्यावसायिक घरामध्ये आंघोळ करत असताना त्याला एक व्हिडिओ कॉल आला होता. त्याने तो उचलला असता आरोपींची त्याचे नग्न चित्रीकरण केले. २८ जूनला घडलेल्या या प्रकारानंतर तक्रारदार व्यावसायिकाला त्याचे चित्रीकरण पाठवून आरोपींनी खंडणीची मागणी केली होती. अन्यथा हे चित्रीकरण समाज माध्यमांवर प्रसारीत करण्याची धमकी आरोपींनी दिली होती. या सर्व प्रकारामुळे घाबरलेल्या तक्रारदार यांनी ३७ हजार रुपये आरोपींना पेटीएमद्वारे पाठवले होते. पण त्यानंतरही आरोपींनी धमकावणे बंद केले नाही. त्यामुळे मानसिक तणावाखाली आलेल्या तक्रारदाराने अखेर याप्रकरणी मलबार हिल पोलिसांकडे तक्रार केली.

त्यानुसार पोलिसांनी खंडणी व माहिती तंत्रज्ञान गैरवापर प्रतिबंधक कायद्याअंतर्गत आरोपींविरोधात गुन्हा दाखल केला होता. आरोपींसोबत झालेल्या आर्थिक व्यवहारांची माहिती पोलिसांनी घेऊन ते सर्व व्यवहार गुजरातमध्ये झाल्याचे निष्पन्न झाले. याप्रकरणी शैलेश भाटी, सवाईलाल दर्जी व जसराज दर्जी यांना मलबार हिल पोलिसांनी अटक केली आहे.

Edited By - Akshay Baisane