एकीकडे वाढते तापमान आणि उकाड्यामुळे मुंबईकरांच्या अंगाची लाही झाली आहे. अंगातून घामाच्या धारा निघत आहेत. तर दुसरीकडे ऐन उन्हाळ्यामध्ये मुंबईकरांवर पाणी कपातीची टांगती तलवार असण्याची शक्यता आहे. कारण मुंबईला पाणीपुरवठा करणाऱ्या ७ धरणांच्या पाणीसाठ्यात मोठी घट झाली आहे. फक्त १९ टक्के पाणीसाठी शिल्लक राहिला आहे. त्यामुळे मुंबईकरांची पाण्याची चिंता वाढण्याची शक्यता आहे.

मिळालेल्या माहितीनुसार, मुंबईला पाणीपुरवठा करणाऱ्या तलावांत फक्त १९ टक्के पाणीसाठा शिल्लक राहिला आहे. त्यामुळे मुंबईत पाणीटंचाईची भीती व्यक्त होत आहे. मात्र, अद्याप याबाबत कोणतीही घोषणा करण्यात आलेली नाही. मुंबईला अप्पर वैतरणा, मध्य वैतरणा, मोडक सागर, भातसा, तानसा, तुळशी आणि विहार या सात धरणांमधून पाणी पुरवठा केला जातो. यातील अप्पर वैतरणा, मध्य वैतरणा, भातसा हे तलावही आटले आहेत.

मुंबईला पाणी पुरवठा करणाऱ्या धरणातील पाणीसाठा -

- अप्पर वैतरणा - १८.५६ टक्के

- मध्य वैतरणा - ९.६६ टक्के

- मोडक सागर - २४.२७ टक्के

- तानसा - ३५.८७ टक्के

- भातसा - १८ टक्के

- विहार - ३२.६६ टक्के

- तुळशी - ३७. ६७ टक्के

दरम्यान, मुंबईला पाणीपुरवठा करणाऱ्या सातही धरणातील पाणीसाठा कमी झाल्यामुळे मुंबईकरांची चिंता वाढली आहे. यामुळे पाणीकपात होण्याची शक्यता वर्तवली जात आहे. पण मुंबई महापालिका प्रशासनाकडून अद्याप पाणी कपातीचे कोणतेही संकेत दिले नाहीत. मात्र मुंबईकरांनी पाणी जपून वापरावे असे आवाहन केले जात आहे. पालिका प्रशासनाकडून धरणातील पाणीसाठ्याचा आढावा घेऊन नंतर पाणीकपातीबाबतचा निर्णय घेतला जातो. आता या धरणातील पाणीसाठा कमी झाला आहे त्यामुळे पालिका नेमका काय निर्णय घेते याकडे सर्वांचे लक्ष लागले आहे.