संजय गडदे, प्रतिनिधी

Maratha Reservation Protest:

मराठा आरक्षणाचा लढा राज्यात दिवसेंदिवस तीव्र होत आहे. मनोज जरांगे पाटील यांनी आरक्षणाच्या निर्णयासाठी २४ डिसेंबरपर्यंतचा अल्टिमेटम दिला आहे. जरांगे पाटील यांनी उपोषण मागे घेण्याच्या निर्णयानंतरही राज्यात विविध भागात आरक्षणाची लढाई सुरू असून मराठा बांधव आक्रमक झाल्याचे दिसत आहे. मुंबईच्या सांताक्रुज वाकोला परिसरात सकल मराठा समाजाच्या वतीने एक दिवसीय उपोषण करण्यात आले.

याबाबत सविस्तर माहिती अशी की, मुंबईच्या (Mumbai) सांताक्रुज वाकोला परिसरात मराठा आरक्षणाच्या मागणीसाठी सकल मराठा समाजाच्या वतीने एक दिवसीय उपोषण करण्यात आले. परिसरातील शेकडो मराठा बांधवांनी दिवसभर उपस्थित राहून मनोज जरांगे पाटलांच्या (Manoj Jarange Patil) समर्थनार्थ लाक्षणिक उपोषण केले.

या वेळी दोन विदेशी नागरिकांनीही या लाक्षणिक उपोषणात सहभाग दाखवून 'एक मराठा लाख मराठा' च्या घोषणा दिल्या. लंडनवरून आलेले हे दोघेजण वाकोला परिसरात आले असता त्या ठिकाणची घोषणाबाजी पाहून कुतूहलाने त्यांनी आंदोलकांची चौकशी केली.

दरम्यान आंदोलकांच्या मागण्यांची त्यांना जाणीव होताच त्यांनीही त्या उपोषणात सहभागी होऊन मराठा बांधवांबरोबर घोषणाबाजी करत आंदोलनात सहभाग नोंदवला. दरम्यान, मनोज जरांगे पाटील यांनी आरक्षणाच्या निर्णयासाठी २४ डिसेंबरपर्यंतचा अंतिम अल्टिमेटम दिला आहे. त्यानंतर निर्णय न झाल्यास आक्रमक भूमिका घेणार असल्याचेही त्यांनी सांगितले आहे. (Latest Marathi News)