मयूर राणे, साम टीव्ही

मुंबई : मुंबईहून नांदेडला जाणाऱ्या एक्स्प्रेस ट्रेनमध्ये भल्या पहाटे चोरीचा प्रयत्न झाल्याची घटना घडली आहे. भांडुप आणि कांजूरदरम्यान पहाटे साडेतीन वाजता ट्रेनचा वेग कमी झाल्याने दरोडेखोर डब्ब्यात शिरला. त्यानेतर या दरोडेखोराने ४४ वर्षीय महिला प्रवाशाची पर्स चोरण्याचा प्रयत्न केला. मात्र, पर्स वाचवण्याच्या प्रयत्नात महिलेचा पती गंभीर जखमी झाला.

मिळालेल्या माहितीनुसार, दरोडेखोर भल्या पहाटे ट्रेनमध्ये शिरला. त्यानंतर दरोडेखोराने महिला प्रवाशाची पर्स चोरून उडी घेण्याचा प्रयत्न केला. यामुळे या चोराच्या मागे महिला प्रवासी दिपाली धावल्या. महिला प्रवासी दिपाली पर्स वाचवण्याचा प्रयत्नात ट्रेनमधून खाली पडल्या.

दिपाली ट्रेनमधून बाहेर पडल्यानंतर पती त्यांना वाचवायला गेले. त्यावेळी त्यांचाही तोल गेला. त्यामुळे ते देखील ट्रेनमधून खाली पडले. या घटनेत त्यांच्या हात ट्रेनखाली आला. यामुळे त्यांच्या हाताला मोठी दुखापत झाली आहे. या घटनेत महिलेच्या पतीला एक हात गमवावा लागला आहे.

दरोडेखोरीच्या विरोधात तक्रार करून वीस दिवस उलटून गेले आहेत. तरी कुर्ला जीआरपीला आरोपीचा शोध घेता आला नाही. यामुळे कुर्ला जीआरपीने दोन संशयितांचे रेखाचित्र जारी केले आहेत. संशयित व्यक्ती कुठे आढळल्यास दिसून आल्यास कुर्ला जीआरपी किंवा कुर्ला जीआरपी कंट्रोल रूमला कळविण्यात यावे, असे आवाहन करण्यात आलं आहे.

दरम्यान, मुंबईच्या लोकमान्य टिळक टर्मिनलवरून नांदेडला जाणाऱ्या एक्सप्रेस ट्रेनमध्ये डॉक्टर दाम्पतासोबत ही घटना घडली आहे. या घटनेत महिलेच्या पतीला एक हात गमवावा लागला आहे. मुंबईतील दरोड्याच्या घटनेने रेल्वेच्या सुरक्षा व्यवस्थेवर गंभीर प्रश्नचिन्ह करण्यात येत आहे.