ठाणे : मुंबई मेट्रो लाईन ४ प्रकल्पांच्या अंतर्गत स्ट्रक्चरल गर्डर बसवण्याचे काम सुरु आहे. यासाठी ठाणे वाहतूक पोलिसांनी विशेष उपाययोजना करण्यात आल्या आहेत. यानुसार, २२ जून ते १४ जुलै या कालावधीत रात्री ११ ते पहाटे ४ वाजेपर्यंत घोडबंदर रोडवरुन प्रवास करणाऱ्या वाहनचालकांना दुसऱ्या मार्गाने प्रवास करावा लागणार आहे.

स्ट्रक्चरल गर्डर बसवण्याचे काम नागलाबंदर सिग्नल ते इंडियन ऑइल पंप आणि नागलाबंदर ते भाईंदरपाडा या दोन प्रमुख भागांमध्ये केले जाणार आहे. मुंबई महानगर प्रदेश विकास प्राधिकारण म्हणजेच एमएमआरडीए आणि त्यांचे भागीदार हे काम रात्रीच्या वेळेत पूर्ण करणार आहेत. वाहतुकीचा अडथळा कमी व्हावा या उद्देशाने ही कामे रात्री केली जाणार आहेत.

वाहतुकीसाठी नवे मार्ग:

जड वाहनांसाठी पिलर क्रमांक ८५ जवळून गायमुख दिशेने जाण्यास मनाई असेल. त्यांना यू-टर्न घेऊन पोरबंदर ठाणे मुख्य रस्त्यावर जावे लागेल. त्यानंतर पिलर १०२ वरुन उजवीकडे वळून मुख्य मार्गावर परत यावे लागेल. इतर हलक्या वाहनांसाठीची वाहतूक पिलर ८५ जवळील सर्व्हिस रोडवर वळवली जाईल. त्यानंतर इंडियन ऑइल पंपजवळ पुन्हा मुख्य रस्त्यावरुन प्रवास करता येईल.

ठाण्याकडे जाण्यासाठी पर्यायी मार्ग :

घोडबंदर बाजूने ठाण्याकडे जाणाऱ्या वाहनांना नागला बंदर आणि आशा वाईन शॉपजवळ थांबवण्यात येईल. त्यानंतर नागला बंदर डेपोमधून वळसा घेऊन लोढा स्प्लेंडोरा कॉम्प्लेक्सजवळील मुख्य रस्त्यावर येऊन प्रवास सुरु ठेवावा लागेल. रुग्णवाहिका, अग्निशमन, पोलिस, ऑक्सिजन टँकर यांसारख्या अत्यावश्यक सेवा वाहनांना या निर्बंधातून सूट देण्यात आली आहे.