Mega Block : विविध अभियांत्रिकी आणि देखभालीची कामे करण्यासाठी मध्य रेल्वे प्रशासनाद्वारे मध्य आणि हार्बर रेल्वे मार्गावर रविवार १५ जून २०२५ रोजी मेगा ब्लॉक असणार आहे. छत्रपती शिवाजी महाराज टर्मिनस ते विद्याविहार अप आणि डाउन धीम्या मार्गावर आणि पनवेल ते वाशी अप आणि डाउन मार्गावर पाच तास मेगा ब्लॉक असणार आहे.

सीएसएमटी ते विद्याविहार अप आणि डाउन धीम्या मार्गावर (सकाळी १०.५५ ते दुपारी ३.५५)

रविवारी छत्रपती शिवाजी महाराज टर्मिनस येथून सकाळी १०.४८ ते दुपारी ३.४५ या वेळेत सुटणाऱ्या सर्व डाउन धीम्या लोकल गाड्या या सीएसएमटी आणि विद्याविहार स्थानकांदरम्यान डाउन जलद मार्गावर वळवल्या जातील. या गाड्या भायखळा, परळ, दादर, माटुंगा, शीव आणि कुर्ला या स्थानकांवर थांबतील आणि त्यानंतर विद्याविहारपासून पुन्हा डाउन धीम्या मार्गावर धावतील. त्याचप्रमाणे, घाटकोपर येथून सकाळी १०:१९ ते दुपारी ३:५२ या वेळेत सुटणाऱ्या अप धीम्या लोकल गाड्या या विद्याविहार आणि CSMT दरम्यान अप जलद मार्गावर वळवल्या जातील. या गाड्यांचा थांबा कुर्ला, शीव, माटुंगा, दादर, परळ आणि भायखळा स्थानकांवर असेल.

पनवेल-वाशी अप आणि डाउन धीम्या मार्गावर (सकाळी ११.०५ ते दुपारी ४.०५)

रविवारी पनवेलहून सकाळी १०.३३ ते दुपारी ३.४९ या वेळेत सीएसएमटीसाठी सुटणाऱ्या अप हार्बर मार्गावरील ट्रेन आणि सीएसएमटीहून सकाळी ९.४५ ते दुपारी ३.१२ या वेळेत सुटणाऱ्या पनवेल/बेलापूर येथे जाणाऱ्या डाउन हार्बर मार्गावरील ट्रेन सेवा रद्द राहतील. दुसऱ्या बाजूला, पनवेलहून ठाणेकडे जाणाऱ्या अप ट्रान्स-हार्बर मार्गावरील लोकल सेवा सकाळी ११:०२ ते दुपारी ३:५३ या वेळेत रद्द करण्यात येतील. तसेच, ठाण्याहून पनवेलकडे जाणाऱ्या डाउन ट्रान्स-हार्बर मार्गावरील लोकल सेवा सकाळी १०:०१ ते दुपारी ३:२० या वेळेत रद्द राहतील.

ब्लॉक काळात -

- सीएसएमटी - वाशी यादरम्यान विशेष लोकल रेल्वे गाड्या चालवल्या जाणार आहेत.

- ठाणे - वाशी/ नेरुळ या दरम्यान ट्रान्स हार्बर लाईन सुरु असेल.

- बंदर लाईन सेवा उपलब्ध असतील.