संजय गडदे, मुंबई

मुंबईतील कुरार पोलीस ठाण्याचे वरिष्ठ पोलीस निरीक्षक सुशील कुमार गायकवाड यांचे हृदयविकाराच्या तीव्र झटक्याने निधन झाल्याची दुर्दैवी घटना समोर आली आहे. आज सकाळी घरातून कामावर जाण्यासाठी निघाले असताना त्यांना अचानक हृदयविकाराचा झटका आला. रुग्णालयात उपचारासाठी दाखल करण्यापूर्वीच त्यांचे निधन झाले. या घटनेमुळे पोलीस दलात हळहळ व्यक्त केली जात आहे.

सुशील कुमार गायकवाड यांनी काही महिन्यांपूर्वीच कुरार पोलीस ठाण्याच्या वरिष्ठ पोलीस निरीक्षकपदाची जबाबदारी स्वीकारली होती. त्यापूर्वी ते पोलीस निरीक्षक म्हणून कार्यरत होते. नुकतीच त्यांना वरिष्ठ पोलीस निरीक्षकपदी पदोन्नती मिळाली होती. पदोन्नतीनंतर त्यांच्यावर महत्त्वाची जबाबदारी सोपवण्यात आली होती.

गायकवाड यांच्या निधनाची बातमी समजताच कुरार पोलीस ठाण्यातील अधिकारी आणि कर्मचाऱ्यांमध्ये शोककळा पसरली.तसेच त्यांच्या निधनाने गायकवाड कुटुंबावर दुःखाचा डोंगर कोसळला आहे. पोलीस दलात अधिकाऱ्यांना अनेकदा खूप वेळ काम करावे लागते, अनियमित दिनचर्या, सततचा मानसिक ताण आणि विविध जबाबदाऱ्यांचा सामना करावा लागतो.

कायदा व सुव्यवस्था राखणे, गुन्ह्यांचा तपास करणे आणि नागरिकांच्या तक्रारींचे निवारण करणे अशा अनेक कामांमुळे पोलिसांवरील जबाबदाऱ्यांचा भार वाढत असतो. गायकवाड यांच्या आकस्मिक निधनाच्या पार्श्वभूमीवर पोलिसांच्या आरोग्याचा आणि कामाच्या ताणाचा प्रश्न पुन्हा एकदा चर्चेत आला आहे.