22 year old stabbed in Mumbai local train : मुंबईची लाईफलाईन म्हणजेच 'मुंबई लोकल' पुन्हा एकदा एका रक्ताळलेल्या घटनेने हादरली आहे. मुसळधार पावसात लोकलच्या डब्याचा दरवाजा बंद करण्यासारख्या अत्यंत किरकोळ कारणावरून वाद झाला. या वादाचे रूपांतर थेट हत्येत झाल्याची धक्कादायक घटना समोर आली आहे. चर्चगेट ते नालासोपारा जाणाऱ्या लोकलच्या फर्स्ट क्लास डब्यात एका २२ वर्षीय तरुणावर सहप्रवाशाने चाकूने जीवघेणा हल्ला केला. धावत्या ट्रेनमध्ये झालेल्या या रक्तरंजित थरारामुळे मुंबईकरांच्या सुरक्षेचा प्रश्न पुन्हा एकदा ऐरणीवर आला आहे.

चर्चगेट-नालासोपारा फास्ट लोकलच्या फर्स्ट क्लास डब्यातून प्रवास करणाऱ्या मयंक लोहार (२२ वर्ष) या तरुणाचा खून करण्यात आला. मुसळधार पावसामुळे लोकलचा दरवाजा बंद करण्यावरून एका दुसऱ्या प्रवाशासोबत वाद झाला. या वादात आरोपीने मयंकच्या पोटात चाकूने वार केले. बोरिवली स्थानकावर लोकल पोहोचताच आरोपी पळून गेला. दुर्दैवाने उपचारादरम्यान मयंकचा मृत्यू झाला असून रेल्वे पोलीस (GRP) आरोपीचा शोध घेत आहेत.

नेमकं काय झालं?

मंगळवारी रात्रीपासून मुंबईत मुसळधार पाऊस पडत आहे. रात्री लोकल ट्रेन गर्दीने भरलेली होती. पावसाचे पाणी डब्यात येऊ नये म्हणून लोकलचा दरवाजा बंद करण्यावरून २२ वर्षाच्या मयंक लोहार आणि एका दुसऱ्या सहप्रवाशामध्ये जोरदार वाद झाला. वाद इतका टोकाला गेला की, रागाच्या भरात त्या अज्ञात आरोपीने चाकू काढला आणि धावत्या ट्रेनमध्येच मयंकच्या पोटात थेट वार केले. मयंक गंभीर रक्ताळलेल्या अवस्थेत डब्यातच कोसळला.

रात्री ठीक ११:०४ वाजता लोकल बोरिवली स्थानकात आली. गाडी पूर्ण थांबण्यापूर्वीच आरोपीने चालत्या गाडीतून उडी मारली आणि गर्दीचा फायदा घेत प्लॅटफॉर्मवरून पळ ठोकला. ट्रेन बोरिवलीत पोहोचताच अवघ्या ३ मिनिटांत रेल्वे सुरक्षा बल (RPF) आणि गव्हर्नमेंट रेल्वे पोलीस (GRP) घटनास्थळी धावून आले. त्यांनी तात्काळ स्ट्रेचर आणि वैद्यकीय पथक बोलावून मयंकला डब्यातून बाहेर काढले. बोरिवली स्टेशनच्या इमर्जन्सी मेडिकल रूममध्ये प्राथमिक तपासणी केल्यानंतर, डॉक्टरांच्या सल्ल्यानुसार मयंकला रात्री ११:४२ वाजता रुग्णवाहिकेने कांदिवलीच्या शताब्दी हॉस्पिटलमध्ये हलवण्यात आले.