मुंबई - ८ सप्टेंबर रोजी संध्याकाळी झालेल्या मुसळधार पावसामुळे (Rain) ठाण्यातील (Thane) कळवा येथील भास्कर नगर येथील एक ४ वर्षाचा चिमुकला पाण्याच्या प्रवाहात वाहून गेल्याची दुर्दैवी घटना घडली आहे. अतिवष्टीमुळे भास्कर नगर जवळच असलेल्या डोंगरातून आलेला पाण्याचा मोठा प्रवाह जवळच असलेल्या मारुती चाळ, भास्कर नगर येथे घुसला.

सदर घटनेमध्ये ४ वर्षीय आदित्य मोरया पाण्याचा प्रवाहासोबत वाहून गेल्याची धक्कादायक घटना घडली आहे. या घटनेची माहिती मिळताच आपत्ती व्यवस्थापन अधिकारी व कर्मचारी, ठाणे आपत्ती प्रतिसाद दलाचे जवान, कळवा प्रभाग समिती सहाय्यक आयुक्त व स्थानिक कळवा पोलीस स्टेशनचे अधिकारी व कर्मचारी उपस्थित झाले.

हे देखील पाहा -

प्रवाहात वाहून गेलेल्या चिमुकल्याचा शोधकार्य रात्री उशिरापर्यंत सुरू होता. सदर घटनास्थळी भास्कर नगरमधून मफतलाल कंपाऊंडकडे जाणारा नाला आपत्ती व्यवस्थापन कक्षाचे कर्मचारी व ठाणे आपत्ती प्रतिसाद दलाचे जवान यांच्यामार्फत सुमारे ३ तास शोधकार्य करण्यात आले आहे.

रात्रीच्या अंधारामुळे शोधकार्यात अनेक अडचणी येत असल्याने कळवा पोलीस ठाण्याचे वरिष्ठ पोलिस निरीक्षक मनोहर आव्हाड यांचे आदेशानुसार सदरचे शोधकार्य थांबविण्यात आले आहे. सकाळी ९ वाजल्यानंतर या चिमुकल्यांची शोधमोहीम पुन्हा सुरू करण्यात येणार असल्याची माहिती ठाणे महानगर पालिका आपत्ती व्यवस्थापन विभागाकडून देण्यात आली आहे.