मुंबईतून धक्कादायक बातमी समोर आली आहे. विमानतळ परिसरातील एका नामंकित हॉटेलमध्ये महिलेवर लैंगिक अत्याचार करण्यात आला. याप्रकरणी अहमदाबाद येथील एका व्यावसायिकाला विमानतळ पोलिसांनी अटक केली आहे. पीडित महिलेने २३ जुलै रोजी पोलिस ठाण्यात तक्रार दाखल केल्यानंतर या प्रकरणाचा तपास सुरू करण्यात आला. न्यायालयाने आरोपीला २९ जुलैपर्यंत पोलीस कोठडी सुनावली आहे.

पोलिसांनी दिलेल्या माहितीनुसार, पीडित महिला आणि आरोपी यांची पूर्वीपासून ओळख होती. २० जुलै रोजी दोघेही मुंबई विमानतळाजवळील एका नामंकित हॉटेलमध्ये गेले होते. तिथे दोघेही राहिले होते. त्यानंतर २२ जुलै रोजी आरोपीने महिलेवर तिच्या इच्छेविरुद्ध लैंगिक अत्याचार केल्याचा आरोप करण्यात आला आहे. या घटनेनंतर महिलेने २३ जुलै रोजी विमानतळ पोलिस ठाण्यात धाव घेत तक्रार नोंदवली.

तक्रार मिळाल्यानंतर पोलिसांनी संबंधित माहितीच्या आधारे गुन्हा दाखल केला. त्यानंतर २४ जुलै रोजी आरोपीला अटक करण्यात आली. अटकेनंतर आरोपीला न्यायालयात हजर करण्यात आले असता, पुढील तपासासाठी न्यायालयाने त्याला २९ जुलैपर्यंत पोलीस कोठडी सुनावली. या प्रकरणात पोलिसांकडून हॉटेलमधील पुराव्यांची तपासणी केली जात आहे. तसेच संबंधित व्यक्तींचे जबाब नोंदवण्याची प्रक्रिया सुरू आहे.

या संदर्भात मुंबई पोलिसांचे उपायुक्त (डीसीपी) निमित गोयल यांनी सांगितले की, भारतीय न्याय संहिता (BNS) अंतर्गत कलम ६४, ७४, ७५(२), ७६ आणि ३३३ अन्वये विमानतळ पोलिस ठाण्यात गुन्हा दाखल करण्यात आला आहे. या प्रकरणाचा सर्व बाजूंनी सखोल तपास सुरू असून, तपासातून समोर येणाऱ्या पुराव्यांच्या आधारे पुढील कायदेशीर कारवाई करण्यात येणार असल्याचे त्यांनी स्पष्ट केले.