Mumbai News: दारुमुळे अनेक आयुष्य उद्ध्वस्त झाल्याची अनेक उदाहरण आहे. मुंबईतील धारावीतही अशीच एक घटना समोर आली आहे. धारावीत दारुच्या नशेत पत्नीला पेटवत पतीने आत्महत्या केल्याची घटना समोर आली आहे. धारावीच्या नाईकनगर अशोक गल्ली येथे ही घटना घडली आहे.

या दुर्घटनेत अनिल धुरीया व पिया धुरीया या दोघा पती-पत्नींचा मृत्यू झाला आहे. धारावीत हे दोघं एकत्र राहत असून पती अनिल धुरीयाला दारूचे व्यसन होते. यातूनच दोघांमध्ये वारंवार भांडणं व्हायची. बुधवारी सायंकाळी ६ च्या सुमारास अनिल दारू पिवून आल्याने त्याचे प्रियासोबत भांडण झाले. (Crime News)

वाद इतका विकोपाला गेला की अनिलने दारूच्या नशेत प्रियाच्या अंगावर घरातील रॉकेल ओतून तिला पेटवून दिले. त्यानंतर त्याने स्वत:वर रॉकेल ओतून स्वत:लाही पेटवून घेतले. या घटनेत दोघंही गंभीर जखमी झाल्याने दोघांना उपचारासाठी सायनच्या लोकमान्य टिळक रुग्णालयात दाखल केले.

गुरूवारी अनिल याचा उपचारादरम्यान मृत्यू झाला. तर प्रियावर अतिदक्षता विभागात उपचार सुरू होते. मात्र गुरूवारी सायंकाळी प्रियाचाही उपचारादरम्यान मृत्यू झाल्याचे डॉक्टरांनी घोषित केले. या प्रकरणी धारावी पोलीस ठाण्यात मृत अनिल धारीया विरोधात ३०२ भादवी कलमांतर्गत गुन्हा दाखल करण्यात आला आहे.