मुंबई महापालिका निवडणुकीसाठी भाजप आणि शिवसेना यांच्यात युती झालीय. एकनाथ शिंदेंच्या शिवसेनेला ९० जागा मिळाल्या आहेत. तर भाजप १३७ जागांवर निवडणूक लढवणार आहे. आज उमेदवारी अर्ज दाखल करण्याचा आज शेवटचा दिवस होता. राजकीय पक्षांकडून उमेदवारांना एबी फॉर्मचं वाटप करण्यात आलं. ज्यांना उमेदवारी मिळाली नाही त्यांनी बंडखोरी केली. वॉर्ड क्रमांक २५ मधील चित्रही सारखेच ठरले.

भाजपकडे जागा गेल्याने शिवसेना नेत्यानं बंडखोरी केली आहे. भाजपनं या ठिकाणी अभिनेत्री निशा परुळेकर यांना उमेदवारी दिली होती. मात्र यामुळं नाराज झालेल्या शिवेसनेच्या शेखर शेरे यांनी अपक्ष अर्ज दाखल केलाय. यामुळं निशा परुळेकर यांच्या अडचणी वाढल्यात.

निशा परुळेकरांविरोधात सेनेच्या शेखर शेरेंची बंडखोरी

मागाठाणे विधानसभेमध्ये शिवसेना भाजप आमने-सामने आलेत. भाजपकडून वॉर्ड क्रमांक २५ मधून निशा परुळेकर यांना अधिकृत उमेदवारी जाहीर करण्यात आलीय. मात्र याच वॉर्डात शिंदे गटाच्या शिवसेनेचे नेते शेखर शेरे यांनी अपक्ष उमेदवारी अर्ज दाखल केला आहे. शिवसेनेच्या शेखर शेरे यांच्या बंडखोरीमुळे भाजपच्या परुळेकर यांच्या अडचणी वाढल्या आहेत.

कोण आहेत अभिनेत्री निशा परुळेकर?

अभिनयाच्या क्षेत्रात अनेक वर्ष काम केल्यानंतर अभिनेत्री निशा परुळेकर राजकीय आखाड्यात उतरल्या आहेत. अभिनेत्री निशा परुळेकर यांनी अनेक चित्रपट व नाटकांमध्ये लक्षवेधी भूमिका केल्या आहेत. भरत जाधव यांच्यासोबत ' सही रे सही' यासारख्या तुफान नाटकात त्यांनी काम केलंय. तसेच महानायक व शिमणा या दोन चित्रपटांमध्येही त्यांनी भूमिका साकारली होती. शिवाय महेश कोठारे व्हिजन निर्मित दख्खनचा राजा जोतिबा या मालिकेत त्यांनी महालक्ष्मी अंबाबाईचे पात्र साकारले होते.