संजय गडदे, मुंबई प्रतिनिधी

Mumbai fake degree government job case : देशाच्या आर्थिक व्यवहारांचे लेखापरीक्षण करणाऱ्या 'भारताचे नियंत्रक आणि महालेखापरीक्षक' (CAG) यांच्या मुंबई कार्यालयात फसवणुकीचा एक धक्कादायक प्रकार उघडकीस आला आहे. बनावट बी.कॉम. पदवीच्या आधारे एका तरुणाने केंद्र सरकारमध्ये लेखापरीक्षक (ऑडिटर) म्हणून नोकरी मिळवली आणि तब्बल १४ महिने सरकारी वेतनही लाटले. मात्र, शैक्षणिक पदवीच्या पडताळणीदरम्यान हे सत्य समोर आल्यानंतर संबंधित कर्मचाऱ्याला सेवेतून बडतर्फ करण्यात आले असून, त्याच्याविरुद्ध आझाद मैदान पोलीस ठाण्यात गुन्हा दाखल करण्यात आला आहे.

पोलीस सूत्रांनी दिलेल्या माहितीनुसार, सुखदेव शिवाजी पाटील (वय २७) याने ८ नोव्हेंबर २०२४ रोजी क्रीडा कोट्यातून (Sports Quota) मुंबईतील प्रधान महालेखापाल (ऑडिट)-१ कार्यालयात लेखापरीक्षक म्हणून नोकरी मिळवली होती. या नोकरीसाठी त्याने हिमाचल प्रदेशातील 'आर्णी विद्यापीठा'ची बी.कॉम.ची पदवी सादर केली होती.

संबंधित पदवीबाबत संशय आल्याने वरिष्ठ लेखापरीक्षण अधिकाऱ्यांनी विद्यापीठाकडे पडताळणीसाठी पत्र पाठवले. त्यावर उत्तर देताना, "संबंधित नोंदणी क्रमांक (Registration Number) आमच्या कोणत्याही विद्यार्थ्याचा नसून, सुखदेव शिवाजी पाटील नावाचा विद्यार्थी या विद्यापीठात कधीही शिकलेला नाही," असे विद्यापीठाने स्पष्ट केले.

हा अहवाल प्राप्त होताच विभागाने ३१ डिसेंबर २०२५ रोजी संबंधित कर्मचाऱ्याला 'कारणे दाखवा नोटीस' बजावली. आरोपीने कागदपत्रांची दुरुस्ती करण्यासाठी ६० दिवसांची मुदत मागितली होती; मात्र विभागाने त्याचा दावा फेटाळून लावत ७ जानेवारी २०२६ रोजी त्याला सेवेतून बडतर्फ केले.

या प्रकरणी वरिष्ठ अधिकाऱ्यांच्या तक्रारीवरून २० जुलै २०२६ रोजी आझाद मैदान पोलीस ठाण्यात गुन्हा दाखल करण्यात आला आहे. पोलीस सध्या या फसवणुकीचा पुढील तपास करत असून, आरोपीने १४ महिन्यांत उचललेल्या वेतनाची वसुली करण्याची प्रक्रियाही विभागाने सुरू केली आहे.