संजय गडदे, मुंबई

मुंबईतील बोरीवली येथून मोठी बातमी समोर आली आहे. बोरिवली पूर्व रेल्वे स्टेशनच्या बाहेर सोमवारी सकाळी एक बेवारस बॅग आढळून आल्यानंतर परिसरात एकच खळबळ उडाली. संशयास्पद बॅग दिसताच नागरिकांनी पोलिसांना माहिती दिली. बेवारस बॅग असल्याने काही काळ स्टेशन परिसरात भितीचं वातावरण निर्माण झालं होतं.

कस्तुरबा मार्ग पोलीस स्टेशनला माहिती मिळताच वरिष्ठ पोलीस निरीक्षक जयराज रणवरे यांच्या मार्गदर्शनाखाली ATC अधिकारी API युवराज इनामदार आणि त्यांच्या पथकाने त्वरित घटनास्थळी धाव घेतली. सर्वप्रथम परिसर सुरक्षित करून बॅगची तपासणी सुरू करण्यात आली. तपासात सुटकेसमध्ये ५० ग्रॅम सोनं आणि तब्बल ₹७,५०,००० रोख रक्कम आढळून आली.

पुढील चौकशीत ही बॅग प्रदीप नानुबाई जोशी (वय ७० वर्षे), मूळचे वडोदरा - गुजरात यांची असल्याचे स्पष्ट झाले. ते पोईसर, कांदिवली येथील लग्नसमारंभाला आले असताना चुकून ही बॅग बोरीवली स्टेशनबाहेर विसरून गेले होते. त्यांना बॅग हरवल्याची जाणीवही नव्हती. पोलिसांनी संपर्क साधल्यानंतर जोशी यांनी स्टेशनवर येऊन आपल्या बागेची ओळख पटवली. त्यानंतर कस्तुरबा पोलिसांनी ५० ग्रॅम सोनं आणि ₹७.५० लाख रोख रक्कम सुरक्षित स्वरूपात त्यांच्याकडे सुपूर्द केली.

ननुबाई जोशी यांनी कस्तुरबा मार्ग पोलीस स्टेशनचे मनापासून आभार मानत सांगितले की, “आजच्या काळात इतक्या मोठ्या रकमेची व सोन्याची बॅग सुरक्षित परत मिळणे म्हणजे पोलिसांची प्रामाणिकता आणि तत्परता यांचा उत्तम नमुना आहे.” घटनेमुळे काही काळ परिसरात तणाव आणि भिती निर्माण झाली होती, मात्र कस्तुरबा पोलिसांच्या वेगवान व व्यावसायिक कारवाईमुळे नागरिकांनी सुटकेचा निःश्वास सोडला.