मुंबईत घर घेण्याचं स्वप्न प्रत्येकाचं असतं. पण स्वप्न नगरीत घर घेणं काहींच्या आवाक्याबाहेर जातं, आणि याला कारण आहे घराच्या अव्वाच्या सव्वा किमती. मुंबई उपनगरात घर घेण्याचा विचार जरी केला तरी, ८० ते ९० लाखांत घर मिळणं शक्यच नाही. पण आता मुंबईत आपल्याला १२ लाखांत घर मिळणार आहे. मुंबई महानगरपालिकेच्या कर्मचाऱ्यांसाठी म्हाडाकडून लॉटरी काढण्यात येणार असून, या घरांसाठीच्या अटींमध्येही काही बदल करण्यात आले आहेत.

म्हाडाने माहुलमध्ये तब्बल ४७०० घरे बांधली आहेत. ही घरे महापालिकेचे कर्मचारी १२ लाख ६० हजार रुपयांत घेऊ शकतात. मुंबई महापालिकेच्या कर्मचाऱ्यांसांठी घरांची विक्री करण्याचा निर्णय प्रशासनाने घेतला असून, त्याला प्रतिसाद कमी मिळाल्यामुळे प्रशासनाने अटींमध्ये काही बदल केले आहेत.

बदललेल्या अटींनुसार, आता श्रेणी १ मधील कर्मचारी वगळता सर्वच श्रेणीतील कर्मचारी आणि अधिकारी या घरांसाठी अर्ज करू शकतात. मुख्य म्हणजे, अर्ज करण्याची मुदत देखील १५ मे पर्यंत करण्यात आल्याची माहिती समोर आली आहे.

एमएमआरडीएने प्रकल्प बाधित कुटुंबाच्या पुनर्वसनासाठी महापालिकेला सदनिका हस्तांतरित केल्या होत्या. मात्र, अनेक घरे रिक्त राहिल्याने ती कर्मचाऱ्यांना देण्याचा निर्णय म्हाडकडून घेण्यात आला. मुंबई महापालिका प्रशासन म्हाडाच्या धर्तीवर तृतीय आणि चतुर्थ श्रेणी कर्मचाऱ्यांना पहिल्यांदाच लॉटरी पद्धतीनं स्वत:ची घरे देणार आहेत. माहुल परिसरात २२५ चौ. फुटांची ४ हजार ७०० घरे बांधली असून, १२ लाख ६० हजारात ही घरे विकली जाणार आहेत.