मुंबई : मुंबईकरांसाठी एक मोठी बातमी समोर आली असून बस प्रवास आता महाग होणार आहे. बेस्ट बसच्या प्रवासभाड्यामध्ये दुप्पट वाढ करण्याचा प्रस्ताव मंजूर करण्यात आला आहे. ही भाडेवाढ ८ मे पासून लागू करण्यात येणार आहे. बेस्ट बस भाडेवाढीबाबतच्या प्रस्तावाला मुंबई महापालिका प्रशासनापाठोपाठच परिवहन प्राधिकरणाने मंजूरी दिली आहे.

मुंबईची जीवनवाहिनी असलेल्या बेस्टच्या बसभाड्यात या आठवड्यापासून दुप्पट वाढ होणार आहे. बेस्टनं किमान भाड्यात दुपटीनं वाढ केली आहे. साधारण बसचे किमान भाडे पाच रुपये आहे. त्यात आता वाढ होऊन १० रुपये केलं आहे. तर एसी बसचं किमान भाडे सहा रुपये आहे ते १२ रुपये करण्यात आलं आहे.

पाच किमीपर्यंतच्या अंतरासाठी आता १० रुपये मोजावे लागणार आहेत. १० किमी अंतरासाठी १५ रुपये, १५ किमी अंतरासाठी २० रुपये तर २० किमी अंतरासाठी ३० रुपये मोजावे लागणार आहेत. हे तिकिट दर नॉन एसी बससाठी आहेत. एसी बससाठी तिकिटाचे दर वेगळे आहेत. त्यामध्ये पाच किमी अंतरासाठी आता १२ रुपये मोजावे लागणार आहेत. १० किमी अंतरासाठी २० रुपये, १५ किमी अंतरासाठी ३० रुपये तर २० किमी अंतरासाठी ३५ रुपये मोजावे लागणार आहेत. सवलतीचे दर यापेक्षा कमी असणार आहेत. मुंबई बेस्ट बसचं हे नवीन प्रवासभाडं ८ मे पासून लागू केलं जाणार आहे. त्यामुळे मुंबईकरांच्या खिशाला मात्र जराशी झळ बसणार आहे.