मयूर राणे, मुंबई प्रतिनिधी

मुंबईची लाईफलाईन म्हणून ओळखल्या जाणाऱ्या लोकल ट्रेनमधील प्रवाशांच्या सुरक्षेचा प्रश्न पुन्हा एकदा ऐरणीवर आला आहे. आज दादर रेल्वे स्थानकावर एका धावत्या लोकलवर अज्ञाताने दगड भिरकावल्याची खळबळजनक घटना घडली. या दगडफेकीत महिला डब्यातील एक महिला प्रवासी गंभीर जखमी झाली आहे. त्या महिलेच्या डोळ्याजवळून मोठ्या प्रमाणात रक्त येत होते. त्या महिलेवर खासगी रूग्णालयात उपचार करण्यात येत आहेत.

मिळालेल्या माहितीनुसार, छत्रपती शिवाजी महाराज टर्मिनस (CSMT) येथून सकाळी ७:१४ वाजता बदलापूरच्या दिशेने जाणारी लोकल दादर स्थानकात आल्यानंतर ही घटना घडली. रेल्वे स्थानकाबाहेरील रेल्वे रुळांच्या बाजूला उभं असणाऱ्या एका अज्ञाताने गाडीच्या महिला डब्याला लक्ष्य करत दगड भिरकावला. हा दगड थेट डब्यात बसलेल्या एका महिला प्रवाशाला लागला.

दगड लागल्याचा वेग इतका जास्त होता की, त्या महिलेच्या उजव्या डोळ्याच्या खाली आणि कपाळाच्या बाजूला गंभीर जखम झाली. दगड लागताच डब्यात एकच गोंधळ उडाला आणि इतर महिला प्रवाशांनी आरडाओरडा सुरू केला. जखमी महिलेच्या चेहऱ्यावरून मोठ्या प्रमाणात रक्तस्त्राव सुरू झाला होता. ही घटना लक्षात येताच डब्यातील इतर प्रवाशांनी तातडीने मदतीसाठी धाव घेतली.

गाडी दादर स्थानकात उभी राहताच रेल्वे पोलीस आणि स्थानकावरील कर्मचाऱ्यांनी जखमी महिलेला डब्यातून खाली उतरवले. घटनेचे गांभीर्य ओळखून त्यांना तातडीने रेल्वेच्या प्रथमोपचार केंद्रात नेण्यात आले. प्राथमिक उपचार केल्यानंतर पुढील उपचारांसाठी त्यांना जवळच्या रुग्णालयात हलवण्यात आले आहे.