मयूर राणे, मुंबई

मुंबईतील एक ऑटो रिक्षा चालक महिन्याला ५ ते ८ लाख रुपये कमाई करतो अशी माहिती समोर आली होती. या रिक्षाचालकाची सगळीकडे चांगलीच चर्चा होत आहे. ही व्यक्ती ऑटो रिक्षा चालवून कशापद्धतीने इचके पैसे कमावते असे अनेक प्रश्न सर्वांना पडले होते. या मागचे सत्य काय आहे ते समोर आले आहे. खरंच हा रिक्षाचालक इतके पैसे कमावतो का? हे आपण जाणून घेणार आहोत...

मुंबईतील अमेरिका वाणिज्य दूतावास येथील ऑटो रिक्षाचालक महिन्याला तब्बल ५ ते ८ लाख रुपये कमवत असल्याची माहिती समोर आली होती. इतक्या मोठ्या कमाईमुळे या रिक्षा चालकाला चांगलीच लोकप्रियता मिळाली. पण यानंतर यामागचे सत्य शोधण्याचा प्रयत्न करण्यात आला असता ही सर्व माहिती खोटी असल्याचे रिक्षाचालकाने स्वत:सांगितले. आदिल असं या रिक्षाचालकाचे नाव आहे.

अमेरिका दूतावास येथे विजा इंटरव्ह्यूसाठी येत असलेले नागरिक त्यांच्यासोबत काही बॅग, लॅपटॉप किंवा इलेक्ट्रिक वस्तू घेऊन येतात. या सर्व वस्तू आतमध्ये घेऊन जाण्यास अमेरिका दूतावासात परवानगी नाही. त्यामुळे या व्यक्तींची चांगलीच तारंबळ उडते. मात्र या सर्व नागरिकांची गैरसोय होऊ नये यासाठी रिक्षा चालक आदिल त्यांना मदत करतो. त्यांच्या बॅगे, इलेक्ट्रिक वस्तूची किंवा अन्य सामान तो घेतो आणि सुरक्षित ठेवतो. यासाठी तो त्यांच्याकडून दिवसाचा दर देखील आकारतो.

हा रिक्षाचालक अमिरेकन वाणिज्य दुतावासाबाहेर आपले वाहन पार्क करतो आणि प्रति ग्राहक त्यांच्याकडून १००० रुपये दराने बॅग ठेवण्याची सेवा देतो. दररोज २० ते ३० ग्राहकांसह या रिक्षाचालकाला दररोज २० ते ३० हजार रुपये असे महिन्याला एकूण ५ ते ८ लाख रुपये कमावतो अशी चर्चा होत होती. पण याबाबत या रिक्षाचालकाला विचारले असता त्याने इतकी कमाईची माहिती खोटी असल्याचे सांगितले.

आदिल यांनी सांगितले की, 'ही सगळी अफवा आहे. असे सांगण्यात आले हजार रुपये आम्ही घेतो. मात्र त्यातले सहाशे रुपये हे लॉकर ज्याचा आहे त्याला जातात आणि चारशे रुपये पासपोर्टचे काम करण्यासाठी आलेल्या व्यक्तीचे सामान सुरक्षित ठेवण्यासाठी घेतले जातात. ४०० रुपये भाडे हे रिक्षावाल्यांचे असते. त्यांचा १३ जणांचा ग्रुप आहे आणि सकाळी सहा वाजल्यापासून ते अमेरिका दुतावासाकडे असतात.'