मुंबई : आजपासून नव्या शैक्षणिक वर्षाची सुरुवात झाली आहे. शाळेचा पहिला दिवस असल्याने अनेक पालक त्यांच्या मुलांना शाळेत सोडायला गेल्याचे पाहायला मिळत आहे. नवीन दप्तर, वह्या-पुस्तके अशा असंख्य नव्या गोष्टींमुळे विद्यार्थी देखील आनंदून गेले आहेत. पण शाळा सुरु झाल्याने मुंबईतील एका शाळेतील विद्यार्थ्यांचे जीवन धोक्यात आले आहे. पण का? चला जाणून घेऊयात...

अंधेरी पूर्वेतील महापालिकेच्या शाळेतील विद्यार्थ्यांना धोकादायक इमारतीत शिक्षण घ्यावे लागत आहे. सुमारे ६० वर्षांपूर्वी बांधलेली ही इमारत सध्या अत्यंत जीर्ण अवस्थेत आहे. शाळेच्या इमारतींच्या भिंतींना ठिकठिकाणी मोठे तडे गेले आहेत. काही दिवसांपूर्वी इमारतीचा स्लॅब कोसळल्याची घटना घडली होती. या परिस्थितीमुळे शाळेतील ७०० विद्यार्थ्यांचे जीवन धोक्यात असल्याचे म्हटले जात आहे.

महानगरपालिकेच्या शाळेच्या इमारतीची बिकट अवस्था पाहून विद्यार्थी आणि पालकांमध्ये भीतीचे वातावरण निर्माण झाले आहे. आम्ही महानगरपालिकेच्या शिक्षण विभागाकडे तक्रारी केल्या आहेत, पण त्याकडे दुर्लक्ष करण्यात आल्याचे पालकांनी म्हटले आहे. या प्रकरणामध्ये पालकांनी तीव्र नाराजी असल्याचे पाहायला मिळत आहे.

या गंभीर स्थितीची दखल घेत अंधेरी आमदार मुरजी पटेल यांनी आज शाळेची पाहणी केली. शिक्षण विभागाच्या हलगर्जी कारभारावर त्यांनी नाराजी व्यक्त केली. पटेल यांनी शाळेच्या इमारतीचे स्ट्रक्चरल ऑडिट करण्याची तातडीची मागणी केली आहे. 'शाळेतील इमारत अत्यंत धोकादायक स्थितीत आहे. विद्यार्थ्यांचे भविष्य आणि जीव दोन्ही संकटात आहेत. मी लवकरच मुख्यमंत्री देवेंद्र फडणवीस व उपमुख्यमंत्री एकनाथ शिंदे यांची भेट घेऊन या इमारतीच्या नव्या बांधकामाची मागणी करणार आहे, असे आमदार मुरजी पटेल यांनी म्हटले आहे.