अंबरनाथ : अंबरनाथ पूर्व परिसरात आज एक विचित्र अपघात घडला आहे. अंबरनाथमधील अप्रतिम हॉटेल जवळील अरूंद नाल्याच्या पुलावरून जाणारा ट्रक क्रमांक - MH 04 CU 7681 हा गंधकाने (सल्फर) भरलेला ट्रक अंबरनाथ (Ambernath) कडून शिळ रोडकडे जात असताना नाल्यावरील पुलावर चढ चढताना हा ट्रक रस्त्यावर अचानक बंद पडून तो अचानकपणे पाठीमागे रिव्हर्स आल्याने त्याच्या पाठीमागे असणारी रिक्षा (Rickshaw) सदर ट्रकखाली आल्याने मोठा अपघात झाला.

या अपघातात (Accident) ट्रकखाली येऊन रिक्षात असणाऱ्या टाकीचा स्फोट होऊन ट्रकला (Truck) भीषण आग लागली व आगीमध्ये ट्रकमधील सल्फरने पेट घेतल्याने मोठा स्फोट (Blast) घडून आला. या घटनेत आतापर्यंत दोन जणांचा मृत्यू झाल्याची प्राथमिक माहिती समोर आली आहे. पुलावरच हा अपघात घडून आल्याने बराच काळ वाहतूक ठप्प झाली होती.

सदर घटनेचे गांभीर्य ओळखून घटनास्थळावर अंबरनाथ वाहतुक विभागाने ताबडतोब पोहचून, अपघातामुळे घटनास्थळी निर्माण झालेली वाहतूक कोंडी तात्काळ सोडविण्याचा प्रयत्न केला. या अपघातानंतर नाल्यामध्ये अडकलेला ट्रक आणि ट्रकच्या खाली अडकलेली रिक्षा काढण्याचे काम सुरू असून फायर ब्रिगेडच्या गाड्यासुद्धा घटनास्थळी दाखल झाल्या आहेत.

Edited By : Krushnarav Sathe