मुंबई शहराला पिण्याच्या पाण्याचा पुरवठा करणाऱ्या सात प्रमुख तलावांमध्ये यंदाच्या पावसाळ्यात समाधानकारक पाणीसाठा झाला आहे. रविवार, 23 ऑगस्ट रोजी सकाळी 6 वाजता उपलब्ध आकडेवारीनुसार, सातही तलावांमध्ये एकूण 13,78,143 दशलक्ष लिटर पाणीसाठा असून, हा त्यांच्या एकूण उपयुक्त साठवण क्षमतेच्या 95.22 टक्के इतका आहे.

मात्र, गतवर्षी याच कालावधीत तलावांमध्ये 13,85,750 दशलक्ष लिटर, म्हणजेच 95.74 टक्के पाणीसाठा होता. त्यामुळे यंदाचा साठा गेल्या वर्षीच्या तुलनेत किंचित कमी आहे. 2024 च्या तुलनेत मात्र यंदाची स्थिती चांगली असून, त्या वर्षी याच कालावधीत 94.97 टक्के साठा उपलब्ध होता.

सात तलावांपैकी विहार आणि मोडक सागर तलाव 100 टक्के भरलेले आहेत. तुळशी तलावात 99.35 टक्के, तानसा 99.34 टक्के, मध्य वैतरणा 95.29 टक्के आणि भातसा तलावात 95.14 टक्के पाणीसाठा आहे. तर अप्पर वैतरणा तलाव 89.32 टक्के भरलेला असून, सातही तलावांमध्ये तो सर्वात कमी भरलेला तलाव ठरला आहे.

सध्या अप्पर वैतरणामध्ये 2,02,796 दशलक्ष लिटर, मोडक सागरमध्ये 1,28,925, तानसामध्ये 1,44,122, मध्य वैतरणामध्ये 1,84,414, भातसामध्ये 6,82,194, विहारमध्ये 27,698 आणि तुळशीमध्ये 7,994 दशलक्ष लिटर पाणीसाठा आहे. दरम्यान, गेल्या 24 तासांत तलावांच्या पाणलोट क्षेत्रात हलक्या ते मध्यम स्वरूपाच्या पावसाची नोंद झाली.

अप्पर वैतरणा परिसरात सर्वाधिक 45 मिमी पाऊस झाला. मोडक सागर येथे 20 मिमी, मध्य वैतरणा 16 मिमी, तुळशी 22 मिमी, तानसा 14 मिमी, भातसा 19 मिमी आणि विहार येथे 9 मिमी पावसाची नोंद झाली. जलसाठ्याच्या स्थितीमुळे मुंबईच्या पाणीपुरवठ्याला सध्या मोठा आधार मिळाला आहे.