सचिन गाड

Bandra News: रोजच्या धकाधकीच्या जीवनात अनेकांना घरी जेवण बनवण्यास वेळ मिळत नाही. त्यामुळे अनेक व्यक्ती बाहेर हॉटेल्स किंवा ढाबा अशा ठिकाणी जेवण करणे पसंत करतात. अशात वांद्रे येथून अतिशय किळसवाणा प्रकार समोर आला आहे. (Latest Marathi News)

जेवणात उंदराचे मांस

पोलिसांनी दिलेल्या माहितीनुसार, वांद्रे येथील एका ढाब्यात जेवण्यासाठी गेलेल्या एका व्यक्तीने चिकन डिश मागवली होती. या चिकन डिशमध्ये उंदराचे मांस आल्याने वांद्र्याच्या प्रसिद्ध रेस्टॉरंट विरुध्द गुन्हा दाखल करण्यात आला आहे.

वांद्रे येथील या ढाबाचे मॅनेजर, आचारी आणि चिकन पुरवठा करणाऱ्यां विरोधात गुन्हा दाखल करण्यात आला आहे. भेसळयुक्त खाद्यपदार्थ पुरवणे आणि इतरांचा जीव किंवा व्यक्तिगत सुरक्षितता धोक्यात टाकल्या प्रकरणी गुन्हा दाखल करण्यात आला आहे.

खाजगी बँकेत सीनिअर मॅनेजर असलेले फिर्यादी आणि त्यांचा मित्र रेस्टॉरंटमध्ये जेवायला गेले असता मागवलेल्या चिकनमध्ये त्यांना उंदराच्या मांसाचा तुकडा आढळला. मॅनेजरला जाब विचारला असता त्याने उडवा उडवीची उत्तरे दिली. त्यामुळे दोघांनी थेट पोलीस ठाण्यात धाव घेतली असून तक्रार दाखल केली आहे. या प्रकरणी पोलीस अधिक तपास करत आहेत.

प्रत्येक व्यक्तीची जेवणाची आवड वेगवेगळी असते. उंदिर पाहिला तरी अनेकांना किळस वाटते. आजवर अशा प्रकारच्या अनेक घटना समोर आल्या आहेत. अशा हॉटेल्सवर कडक कारवाई करण्यात यावी अशी मागणी संतप्त नागरिकांनी केलीये.