- सिद्धेश म्हात्रे

गेल्या तीन महिन्यांपासून शाळा सुरु हाेऊन देखील अद्याप दहावीच्या विद्यार्थ्यांना पाठ्यपुस्तके न दिल्याने आज (साेमवार) महाराष्ट्र नवनिर्माण सेनेतर्फे नवी मुंबई महापालिका कार्यालयासमाेर ठिय्या आंदाेलन छेडले. यावेळी मनसे कार्यकर्ते, पदाधिकारी आणि सुरक्षा रक्षक यांच्यात शाब्दिक चकमक देखील उडाली.

नवी मुंबई मनसे दहावीच्या विद्यार्थ्यांच्या पाठ्यपुस्तकांच्या प्रश्नांवर आक्रमक झाल्याचे पाहयला मिळाले. मनसेतर्फे नवी मुंबई मनपा मुख्यालयाच्या प्रवेशद्वाराजवळ ठिय्या आंदोलन करत महापालिका प्रशासनाचा निषेध करण्यात आला.

या आंदाेलनात मनसे पदाधिकारी कार्यकर्त्यांसह दहावीचे विद्यार्थी आणि पालकांनी देखील सहभाग नोंदविला. गेल्या 3 महिन्यांपासून विद्यार्थ्यांना पाठ्यपुस्तके दिले गेली नाहीत. जाेपर्यंत पाठ्यपुस्तके दिली जात नाहीत ताेपर्यंत ठिय्या आंदाेलन सुरुच ठेवणार असा इशारा उपशहर अध्यक्ष निलेश बाणखेले यांनी दिला. या आंदाेलनात मनसेच्या महिला कार्यकर्त्या देखील माेठ्या संख्येने सहभागी झाल्या हाेत्या. हा प्रश्न तात्काळ न सोडविल्यास मनसे स्टाईल आंदोलन करण्याचा इशारा देखील आंदाेलकांनी दिला.

Edited By : Siddharth Latkar