पनवेलहून भावाच्या उत्तर कार्यासाठी गावी निघालेल्या एका दांपत्यावर काळाने घातला आहे. म्हसळा श्रीवर्धन मार्गावर भीषण अपघातात एका व्यक्तीचा दुर्दैवी मृत्यू झाला आहे. मृत व्यक्तीची पत्नी या दृघटनेत गंभीर जखमी झाली आहे. दुचाकीचे नियंत्रण सुटल्याने हा अपघात झाला असल्याचे म्हटले जात आहे. नरेश पाटील असे मृत तरुणाचे नाव आहे. नरेश यांच्या पत्नी राजेश्री पाटीलवर रुग्णालयात उपचार सुरु आहेत. नरेश यांच्या मृत्यूने त्यांच्या कुटुंबावर दुःखाचा डोंगर कोसळला आहे.

मिळालेल्या माहितीनुसार, नरेश पाटील आणि राजेश्री पाटील हे दोघे नरेश यांच्या भावाच्या उत्तर कार्यासाठी पनवेलहून गावी दुचाकीने निघाले होते. आज सकाळी म्हसळा श्रीवर्धन मार्गावर जांभुळ गावच्या हद्दीत दुचाकीचे नियंत्रण सुटल्याने रस्त्या शेजारी झाडीत जाऊन आदळली. या अपघातात नरेश जनार्दन पाटील यांचा जागीच मृत्यू झाला, तर त्यांच्या पत्नी राजेश्री पाटील हिला गंभिर दुखापत झाली.जखमी महिलेवर म्हसळा ग्रामीण रुग्णालयात उपचार सुरू आहेत. या घटनेने श्रीवर्धन पंचक्रोशीत हळहळ व्यक्त होत असून पाटील कुटुंबावर दुःखाचा डोंगर कोसळला आहे.

पुण्यात १९ वर्षीय विद्यार्थ्याचा भीषण अपघात

पुण्यात हडपसरमध्ये मगरपट्टा मुंढवा रोडवर १९ वर्षीय विद्यार्थ्यांचा भीषण अपघातामध्ये जागीच मृत्यू झाला. ही घटना काल रात्री साडेदहा वाजण्याच्या सुमारास घडली. जिशान शेख ( वय १९ रा. उंड्री )असे अपघातात मृत्यू झालेल्या तरुणाचे नाव आहे. जिशान शेख हा मुंढव्याकडून मगरपट्टाच्या दिशेने इलेक्ट्रिक दुचाकी वरून जात होता.यावेळी आणखी एक दुचाकी सोबत वेगाने जात होती. दरम्यान जिशान आणि दुसऱ्या दुचाकीची स्पर्धा चालत असताना जिशानने दुचाकीचा ब्रेक लावल्याने तो उडून दुसऱ्या दिशेला जाऊन पडला. तेव्हा अचानक मुंढव्याच्या दिशेला जाणाऱ्या एका कंटेनरला त्याचे डोके जोरात आदळले. डोक्या मधून रक्ताच्या धारा निघू लागल्या होत्या,तो तडफडत होता.

मगरपट्टा मुंढवा रोडवर वाहतूक कोंडी

नागरिकांनी रुग्णवाहिका बोलवली परंतु तोपर्यंत त्याचा मृत्यू झाला. घटनास्थळी पोलीस व नागरिकांनी रुग्णवाहिका बोलवून त्याला ससून रुग्णालयात पाठवले. दरम्यान त्याच्या बॅगमध्ये, त्याच्या ओळखपत्रानुसार त्याच्या नातेवाईकांना बोलावून घेतले होते. दरम्यान अपघातामुळे मगरपट्टा मुंढवा रोडवर मोठी वाहतूक कोंडी झाली होती. याबाबत अधिक तपास पोलिस करत आहेत.