पुणे रेल्वे विभागातील दौंड गुडस यार्ड आणि दौंड कार्ड लाईन येथील इंटरलॉकिंगचं काम करण्यात येणार आहे. या कामासाठी 29 जुलै ते 1 ऑगस्ट दरम्यान ब्लॉक घेण्यात येणार आहे. त्यामुळे दिवसाला 20 पेक्षा जास्त रेल्वे गाड्या रद्द होणार आहेत. तर 15 ते 20 गाड्यांचे मार्ग वळवण्यात येणार आहेत. काही गाड्या शॉर्ट टर्मिनेट केल्या जाणार आहेत. त्यामुळे प्रवाशांनी प्रवास करताना काळजी घ्यावी, असं आवाहन रेल्वे प्रशासनाकडून करण्यात आलं आहे.

मुंबईत रविवारी मध्य आणि हार्बर रेल्वे मार्गावर मेगाब्लॉक

२८ जुलै २०२४ रोजी म्हणजेच रविवारी रेल्वेच्या मध्य आणि हार्बर रेल्वे मार्गावर मेगाब्लॉक घेण्यात येणार आहे. उपनगरी रेल्वे मार्गावरील रुळांची दुरुस्ती आणि सिग्नल यंत्रणेतील काही तांत्रिक कामे करण्यासाठी मेगाब्लॉक घेण्यात येणार असल्याचं रेल्वे प्रशासनाने म्हटलं आहे.

रविवारी मध्य रेल्वेच्या माटुंगा -ठाणे अप आणि डाउन जलद मार्गावर, तर हार्बर मार्गावरील पनवेल - वाशी अप आणि डाउन मार्गावर मेगाब्लॉक घेण्यात येणार आहे. तर पश्चिम रेल्वेवर रविवारी सकाळी मेगाब्लाक घेण्यात आलेला नाही. पण पश्चिम रेल्वेवर शनिवारी रात्रकालीन मेगाब्लॉक असेल. बोरिवली ते भाईंदर अप- डाऊन धीम्या आणि डाऊन जलद मार्गावर रात्रकालीन मेगाब्लॉक घेण्यात येणार आहे.