Mumbai News :

रेल्वे प्रशासनाकडून हार्बरनंतर आता पश्चिम रेल्वेवर मोठा मेगाब्लॉक घेण्यात येणार आहे. मुंबई सेंट्रल ते बोरिवलीदरम्यान सहाव्या मार्गिकेच्या जोडणीच्या कामसाठी हा मेगाब्लॉक घेण्यात येणार आहे. सलग ११ दिवस हा मेगाब्लॉक असणार आहे. मेगाब्लॉकदरम्यान पश्चिम रेल्वेच्या तब्बल २५० लोक रद्द करण्यात येणार आहेत.

पश्चिम रेल्वेने प्रवास करुन मुंबईत नोकरीसाठी येणाऱ्या नागरिकांची संख्या मोठी आहे. या सर्व प्रवाशांना मेगाब्लॉकदरम्यान मोठा मनस्तान सहन करावा लागू शकतो.

मुंबई सेंट्रल ते बोरिवलीदरम्यान सहाव्या मार्गिकेच्या कामाला रेल्वे प्रशासनाने सुरुवात केली आहे. दसऱ्यानंतर या कामाला वेगाने करण्याचं रेल्वेचं नियोजन आहे. त्यासाठी २५ ऑक्टोबर ते ४ नोव्हेंबरदरम्यान पश्चिम रेल्वेवर मेगाब्लॉक घेण्यात येणार आहे.

मेगाब्लॉकदरम्यान या मार्गावर २५० लोकल रद्द करण्यात येणार आहेत, तर ६१ मेल रद्द करण्यात येणार आहेत. नव्या मार्गिकेवरील रुळजोडणीसाठी रेल्वेची वाहतूक थांबवणे गरजेचं आहे. त्यामुळे रेल्वे अनेक गाड्या रद्द करण्यात येणार आहे.

सहाव्या मार्गिकेचा फायदा काय?

सध्या मुंबई सेंट्रल ते बोरिवलीदरम्यान प्रत्येकी दोन जलद आणि धीम्या मार्गिका आहेत. तर पाचव्या मार्गिकेवरुन मेल एक्सप्रेस धावतात. मात्र सहाव्या मार्गिकेचं काम पूर्ण झाल्यानंतर मेल आणि एक्सप्रेस वाहतुकीसाठी याचा फायदा होईल. येत्या नोव्हेंबरपर्यंत या सहाव्या मार्गिकेचं काम पूर्ण होईल, असा अंदाज रेल्वे अधिकाऱ्यांना आहे.

मुंबईकरांना काय फायदा होणार?

सहाव्या मार्गिकेचं काम पूर्ण झाल्यानंतर लोकलच्या फेऱ्या वाढवण्यासाठी अधिक जागा उपलब्ध होणार आहे. सहावी मार्गिका सुरु झाल्यानंतर लोकलच्या जवळपास २० टक्के फेऱ्या वाढण्यास मदत होऊ शकते. त्यामुळे पश्चिम रेल्वेने प्रवासांना मोठा दिलासा मिळू शकतो.