मुंबई : राज्यात गोवर रुग्णांची संख्या वाढतच चालली आहे. दिवसेंदिवस गोवरचे रुग्ण आढळून येत असल्याने आरोग्य प्रशासनाचं टेन्शन वाढलं आहे. मुंबईत गोवरचा प्रादुर्भाव झपाट्याने वाढत असून गोवरमुळे मृत्यू होण्याच्या संख्येने चिंता वाढवली आहे. मंगळवारी गोवरने आणखी एका चिमुकल्याचा बळी घेतला. (Latest Marathi News)

नालासोपारा येथे राहणाऱ्या एक वर्षाच्या बालकाचा गोवरमुळे मृत्यू झाला. त्यामुळे मुंबईत गोवरने मृत्युमुखी पडलेल्या रुग्णांची संख्या आता ११ इतकी झाली आहे. मृतांपैकी ८ मुंबईतील तर तीन मुंबई बाहेरील रुग्ण आहेत. सद्यस्थितीला मुंबईत गोवरचे २२० रुग्ण उपचार घेत आहेत.

मुंबईत (Mumbai) गोवरचा विळखा बसला असून मुंबईतील झोपडपट्टी भागात गोवरचा उद्रेक झाला आहे. भायखळा, वरळी, वडाळा, धारावी, अंधेरी पूर्व, कुर्ला , भांडुप, मालाड, चेंबूर, गोवंडी, दहिसर या भागात गोवरचे अधिक रुग्ण आढळले आहेत. त्यामुळे या भागात सर्वेक्षण करण्यात येत असून संशयित रुग्णांचा शोध घेण्यात येत आहे.

मुंबईत गोवरचे रुग्ण आढळल्यानंतर पालिकेच्या कस्तुरबा रुग्णालयात दाखल करण्यात येत आहे. दरम्यान, सोमवारी दिवसभरात मुंबईत गोवरच्या १७० संशयित रुग्णांची नोंद झाली. तर दिवसभरात ९ रुग्णांना डिस्चार्ज देण्यात आला. विशेष बाब म्हणजे, गेल्या दोन महिन्यांत १९ मुलांना उपचारासाठी दाखल करण्यात आले होते. त्यापैकी १७ मुलांना डिस्चार्ज देण्यात आला आहे.

Edited By - Satish Daud