महाराष्ट्र राज्य मराठी चित्रपट पुरस्कारांचा हीरक महोत्सवात राडा झालाय. या कार्यक्रमात मुख्यमंत्री देवेंद्र फडणवीस यांच्या भाषणावेळी मोठी घोषणाबाजी करण्यात आलीय. 'खालिद का शिवाजी’ हा मराठी चित्रपटाच्याविरोधात घोषणा करण्यात आलीय. वरळी येथील एनएससीआय डोम येथे हीरक महोत्सवात कार्यक्रम आयोजित करण्यात आला होता. यावेळी ६० आणि ६१ वे महाराष्ट्र राज्य मराठी चित्रपट पुरस्कार प्रदान करण्यात आले. यासह नामांकित राज कपूर कपूर, व्ही शांताराम, जीवनगौरव आणि विशेष योगदान पुरस्कारही यावेळी प्रदान केले गेले. मात्र कार्यक्रमात देवेंद्र फडणवीस यांच्या भाषणावेळी घोषणाबाजी झाली.

'खालिद का शिवाजी’ या चित्रपटाच्या विरोधात घोषणा देण्यात आल्या. या चित्रपटात छत्रपती शिवाजी महाराजांच्या संदर्भात काही वादग्रस्त मांडणी असल्याचा आरोप करत हिंदू महासंघाने चित्रपटावर तात्काळ बंदी घालण्याची मागणी केली होती. दरम्यान घोषणाबाजी करणाऱ्या दोघांना पोलिसांनी ताब्यात घेतलंय. दर्शकांच्या रांगेत बसलेल्या दोघांनी हातात फलक घेऊन घोषणाबाजी केली. 'खालिद का शिवाजी’ या चित्रपटाच्या विरोधात त्यांनी घोषणा दिल्या. इतिहासाचे विकृतीकरण थांबवा, अशी निदर्शन करणाऱ्यांची मागणी होती.