संजय गडदे, साम टीव्ही

मुंबई–ठाणे परिसरात पुन्हा कबूतरखाना सुरू करण्याचा विषय तापत असून मराठी एकीकरण समितीने यावर तीव्र आक्षेप नोंदवला आहे. 'कुठलाही कबूतरखाना पुन्हा सुरू होऊ देणार नाही; गरज पडली तर आम्हीही रस्त्यावर उतरू, अशी भूमिका समितीचे अध्यक्ष गोवर्धन देशमुख यांनी कडाडून चेतावणी दिली.

गोवर्धन देशमुख यांचं म्हणणे आहे की, सुप्रीम कोर्ट आणि उच्च न्यायालयाने दिलेल्या स्पष्ट आदेशांनंतरही महानगरपालिका मुद्दाम विषय जिवंत ठेवत आहे. त्यामुळे मुंबई–ठाण्यातील नागरिकांच्या आरोग्याशी मोठा धोका निर्माण होतो. समितीचा आरोप आहे की काही जैन मुनिंनी हा मुद्दा सतत तापवत ठेवण्याचा प्रयत्न केला आहे. सरकारलादेखील आंदोलनाच्या धमक्या दिल्या जात आहेत'.

'लोकांना महत्त्वाची हजारो कामं आहेत, राज्यात गंभीर प्रश्न आहेत; पण काही लोक कबूतरखाना हा एकच मुद्दा वारंवार घोळवत आहेत. आम्ही शांत बसणार नाही. समुद्रकाठचे कबूतरखाने बंद झाले ते योग्य झाले—ते कायम बंदच राहिले पाहिजेत,” असा कडक इशारा देशमुख यांनी दिला.

मुंबईत कुठेही कबूतरखाने पुन्हा सुरु करण्याचा कोणताही प्रयत्न झाला तर व्यापक आंदोलन उभारले जाईल, असे मराठी समितीने स्पष्ट केले. तर नागरिकांच्या आरोग्याशी खेळणाऱ्या कोणत्याही निर्णयाला कडाडून विरोध केला जाईल, असेही समितीने स्पष्ट केलं.